|
T'en r'souveins-tu, d'chutte séthée-là? Ch'tait un dimanche dé Juin J'tions dans l'parleux; la f'nêtre, ouvèrte A maintchi, laîssant v'nîn L'odeu d'la violette et dé roses Dans tout l'appartément. Lé jour baîssait, toute la natuthe S'endormait trantchillement. Une pétite brise, v'nant du gardîn, Souôl'vait les longs ridgeaux, Ouis-tu l'critchet, lé ch'va d'Saint George, Qui criyaient dans un clios? Vis-tu pâsser une coq-souothie, Qui volait tout d'travèrs? Entendis-tu un êtcherbot Pâsser l'long des rôsiers? T'en rappelles-tu, qui faîsait sombre Mais n'tait pas niet oquo - Pas justement - quand j'allumi Les chandelles sus l'piano? Vis-tu qu'lus lueur n'tait pon bein forte Quand tu qu'menchis à jouer, Et qu'Georges et mé j'nos assiévimes Tout près, pour êcouter? T'en rappelles-tu, quand tu chanti, Coumment qu'j'étions sérieux? Qu'nou n'ouiait qu'ta mûsique et té Chu sé-là dans l'parleux? Prîns-tu avis combein longtemps Qué la séthée duthi? Té r'souveins-tu oquoth' ach't'euthe Des mots qu'tu nos chanti? Té r'souveins-tu qu'lé p'tit restait Sus les g'noux à san p'pée A t'êcouter l's yeux grands ouvèrts? Prîns-tu avis qu'sa m'mée Vîns douoch'ment allumer la lampe? Jé crai qu'tu n'en vis rein Ta pensée 'tait avec tan chant Et comme tu chantais bein! Pouôrrais-tu dithe combein longtemps Qu'y'a qu'chonna s'pâssit? Ches bouans vièrs jours né r'veindront pus; Avec tout lus pliaîsi! En vieillissant j'avons pèrdu Hardi de nos vielles jouaies Mais nou r'vit tout dans sa pensée En sé r'souv'nant, tchiquefais! Elie
(Vèrsion modèrnîsée:) T'en r'souveins-tu, d'chutte séthée-là?Ch'tait un dînmanche dé Juîn J'tions dans l'parleux; la f'nêt', ouvèrte À maîntchi, laîssant v'nîn L'odeu d'la violette et dé roses Dans tout l'appartément. Lé jour baîssait, toute la natuthe S'endormait trantchillement. Eune pétite brise, v'nant du gardîn, Souôl'vait les longs ridgeaux, Ouîs-tu l'critchet, lé j'va d'Saint George, Tchi criyaient dans un clios? Vis-tu pâsser eune caûque-souothis, Tchi volait tout d'travèrs? Entendis-tu un êtcherbot Pâsser l'long des rôsièrs? T'en rappelle-tu, qu'i' faîsait sombre Mais n'tait pas niet acouo - Pas justément - quand j'alleunmis Les chandelles sus l'piano? Vis-tu qu'lus lueu n'tait pon bein forte Quand tu c'menchis à jouer, Et qu'Georges et mé j'nos assiévînmes Tout près, pour êcouter? T'en rappelle-tu, quand tu chantis, Coumment qu'j'étchions séthieux? Qu'nou n'ouïyait qu'ta mûsique et té Chu sé-là dans l'parleux? Prîns-tu avis combein longtemps Qué la séthée duthit? Té r'souveins-tu acouoth' achteu Des mots qu'tu nos chantis? Té r'souveins-tu qu'lé p'tit restait Sus les g'nouors à san p'pèe A t'êcouter l's ièrs grands ouvèrts? Prîns-tu avis qu'sa m'mèe Vînt douochement alleunmer la lampe? Jé crai qu'tu n'en vis rein Ta pensée 'tait auvec tan chant Et comme tu chantais bein! Pouôrrais-tu dithe combein longtemps Qu'y'a qu'chonna s'pâssit? Ches bouans vièrs jours n'èrveindront pus; Auvec tout lus pliaîsi! En vieillissant j'avons pèrdu Hardi dé nos vielles jouaies Mais nou r'vit tout dans sa pensée En s'èrsouv'nant, tchiquefais! |
Viyiz étout: