La Révélâtion, Chapitre 7
La Révélâtion, Chapitre 7, vèrsets 9 à 17
Épis j'vis eune grande armée d'gens qué nou n'pouôrrait pon compter, dé toutes les nâtions et dé touos les tribus et peupl'yes et langues. Habilyis en blianches robes et auve des branques à la main, i' prîntent lus pliaiches l'avant au trône et à l'Angné,
et d'eune grande vouaix i' dîtent, "Salut au Bouôn Dgieu tch'est assis sus l'trône et à l'Angné!"
Et touos l's anges 'tait à l'entou du trône, et des gouvèrneurs et des quat' bêtes; et i' lus prostèrnîtent l'avant au trône, en louangeant l'Bouôn Dgieu en dîthant,
"Qu'i' sait ainchîn: qu'la bénédiction et la glouaithe et la sagesse et la louange et l'hounneu et l'pouvé et la forche saient donnés au Bouôn Dgieu à tout janmais. Qu'i' sait ainchîn."
Et iun des gouvèrneurs rêponnit et m'dit, "Les cheins habilyis en blianc, tchi qu'i' sont et dé ioù qu'i' vîntent?"
Et j'lî dis, "Messire, ou l'savez." Et i' m'dit, "Ches'-chîn sont les cheins tch'ont pâssé la grand' êpreuve, et lus robes ont 'té lavées et blianchies dans l'sang d'l'Angné.
Né v'là pouortchi qu'i' sont là l'avant au trône du Bouôn Dgieu, et i' sont ses sèrveurs niet' et jeu siez li; et l'chein tch'est assis sus l'trône es'sa lus abri:
i' n'éthont d'aut' faim ni sé; et i' n's'sont d'aut' brûlés par l'solé;
car l'Angné tch'est sus l'trône s'sa lus gardeux et lus dgide ès fontaines dg'ieau vivante, et i' siqu'tha toutes les lèrmes dé lus ièrs.
Chapitre 7, vèrsets 1-17
Auprès chenna j'vis quat' anges mâtés ès quat' carres d'la tèrre, en r'ténant les quat' vents d'la tèrre à seule fîn qu'i' n'ventîsse ni sus la tèrre ni sus la mé ni sus autchun bouais. Épis j'vis acouo un ange en v'nant d'l'Êst auve la scêlle du Bouôn Dgieu vivant. I' briyit à haûteu d'vouaix ès quat' anges tch'avaient r'chu l'pouver d'faithe ma à la tèrre et à la mé: "N'faites pon d'ma ni à la tèrre ni à la mé ni ès bouais d'vant qu'j'eûssions scêllé les fronts des sèrvants d'not' Dgieu."
Épis j'ouïs l'nombre des cheins tch'avaient 'té scêllés: chent quarante-quat' mille des toutes les tribus d'Israël; d'la tribu d'Judâ, douze mille 'taient scêllés; d'la tribu d'Ruben, douze mille; d'la tribu d'Gad, douze mille; d'la tribu d'Asèr, douze mille; d'la tribu d'Nephthali, douze mille; d'la tribu d'Manassé, douze mille; d'la tribu d'Siméon, douze mille, d'la tribu d'Lévi, douze mille, d'la tribu d'Issacar, douze mille; d'la tribu d'Zébulon, douze mille; d'la tribu d'Joseph, douze mille; et d'la tribu d'Bajomîn, douze mille.
Auprès chenna j'èrgardis et y'avait l'avant à mé un amas d'gens qu'nou n'pouôrrait pon compter, d'toutes les nâtions, d'toutes les tribus, d'touos les peupl'yes et d'toutes les langues, mâtés l'avant au trône et l'avant à l'Angné. I' 'taient habilyis en blianches robes et t'naient des branques dé palme ès mains. Et i' briyîdrent à haûteu d'vouaix: "Lé salut appartcheint à not' Dgieu tch'est assis sus san trône, et à l'Angné."
Touos l's anges 'taient mâtés l'tou du trône et des vièrs et des quat' criatuthes vivantes. I' lus adentîdrent l'avant au trône et adouothîdrent lé Bouôn Dgieu, en dîthant:
"Âmen! Qu'des louanges et d'la glouaithe et d'la sagesse et d's èrmèrcîmenta et d'l'hounneu et du pouver et d'la forche saient à not' Dgieu à tout janmais! Âmen!"
Épis iun des vièrs mé d'mandit, "Ches'-chîn habilyis en blianches robes - tchi qu'i' sont et dé iou qu'i' veinnent?"
J'rêponnis, "Moussieu, ou l'savez."
Et i' dit, "Ches'-chîn sont les cheins tchi lus sont dêhalés du grand hèrtchîn; i' lus sont lavé les robes et l's ont blianchi dans l'sang d'l'Angné. Ch'est en tchi i' sont l'avant au trône du Bouôn Dgieu et l'sèrvent niet' et jeu dans san templ'ye; et li tch'est assis sus l'trône l's abriétha atout sa présence. I' n'éthont d'aut' faim; i' n'éthont d'aut' sé. Lé solé n'les brûl'la d'aut', et i' n'lus éthont d'aut' d'arsion. Ch'est en tchi l'Angné au mitan du trône es'sa lus gardeux d'brébis; i' les conditha ès r'ssources dg'ieau vivante et l'Seigneu Dgieu êssuyêtha les lèrmes dé toutes les faches."
Viyiz étout: