1. Not' pèthe qu'est au Ciel, j'prions que parmi toutes les jouaies et fêtes d'la saîson, j'n'oubliêthons pas ch'la qu'lé vrai Noué veurs dithe.

J'té d'mandons d'accepter nos èrmèrcîments et d'nos remplyi auve l'esprit dé ta charite et d'ta bonté, pour qué j'montrons notre èrconnaîssance par aidgi és siens qu'on bésoin.

J'nos ramémouaithons des siens dans les pays iou tchi l'a du troublye, d'la violence, d'la jalousie, d'la fanmine, d'la souffrance et iou tchi i'a des gens sans lief sus lus téte.

J'prions qu les siens en chèrge des gouvèrnéments du monde sèrvithons lus autorité d'eune manniéthe qué les drouaits d'lus citoyens n'sont pas ignorés, et tchi l'éthont des întentions dé paix, pour tchi piêssent m'ner lus pays d'eune manniéthe honnête et paisibl'ye.

Au nom de not' Sauveur, Jésû Christ, Amen.

2. J'prions pour not' p'tite Ile dé Jèrri; pour lé Bailli, pour les membres d'la Cour et d's' Etats, et pour touos les siens tchi font eune contribution au gouvèrnément et à l'administrâtion. de l'Ile et des Pâraisses.

Jé d'mandons à Dgieu dé l's'enseigni dans la direction dé paix et prospéthité pour l'Ile.

Au nom de not' Sauveur, Jésû Christ, Amen.

3. En priant pour les malades, j'allons èrfliéchi un moment pour ramémouaither en silence, des membres de nos fanmilles, des amis et autchun autres qu'on besoin de nos priéthes. . . . . . . . . . . . . . . . . . .

Piesse t' i êtes tous èrdgéthis.

Chièr Sauveur, j'té d'mandons dé donner d'la sagesse, d'la sympathie et d'la pacienche ès docteurs et ès nosses, pour qu'auve t'n aîgue i' souôlageant et èrgéthithont les siens tchi s'trouvent dans lus soins.

J'donnons nos èrmercîments pour touos les siens qu'on tait malade et tchi sont èrfaits.

Chièr Dgieu, j'té d'mandons dé consoler et d'supporter les siens qu'ont perdu lus parchonnièrs.

Au nom de not' Sauveur, Jésû Christ, Amen.

4. J'èrmércions Dgieu pour lé plyiaîsi dé chanter des Cantiques de Noué à ces sé, et pour l'opportunité d'êcouter l'histouaithe dé la naîssance dé Jésû éxplyitchie dans les léçons.

Jé d'mandons à Dgieu dé nos aidgi à ramémouaithait qué son fis, Jésû Christ, tchi fut né à Noué, dans eune êtablye à Béthléhem, d'vint l'Sauveur à tous.

A travers dé s'n'Esprit, i'nos a donné le plyaîsi d'être ses êfants, et acquo, aujourd'anniet, i nos d'mande d'l'sèrvi et d'créer son Royaume dé Paix, ichin sus la terre.

Toutes nos prièthes, je d'mandons au Nom dé Jésû Christ, Amen.

Après la Collecte

Chièr Dgieu, j'te d'mandons de béni l'Eglyse ichin dé St. André, et j'prions qu'les sou qu'ont tait données à ces sé, 'sont bein utilisées à ton Nom. Amen.

La Bénédiction

Comme ch'est l'dèrnyi sèrvice du Millénaithe pour l'Assembliée, j'èrmèrcions Dgieu pour sa bonté dans l's' années tchi sont passées, et comme j'rentrons dans l'nouvieau Millenaithe, j'prions qu'les mauvaises choses du passer 'sont mînsent dé côté, et chièr Dgieu j'té supplions d'la part du monde entchi qué:-

Iou tchi i'a haine ou jalousie, dé donner d'l'amiêtchi.
Iou tchi i'a tort, pardon.
Iou tchi i'a des doutes, fouai.
Iou tchi i'a m'sespé, espéthance.
Iou tchi i'a des ténèbres, d'la lumiéthe.
Iou tchi i'a d'la tristesse, jouaie.

Aiméz et sèrvez Dgieu, et rêjouissez vous dans l'pouver du Saint Esprit,

Amen.