Moussieu l'Editeu,
Je vait par la gâzette que les Villais sont ben mârris parsque n'y'avait pas d'lait jeudi sinon pour les mousses, les mousettes et les touos p'tiots.
La Merrienne, tch'y passe sa vie à m'contrédithe, dit que ch'n'est pas juste que les pouôres vieilles gens n'aient pas au mains lûs pinte, et ou d'mande si ch'est la faute des vaques, tchi sont on strike, ou si ch'est les fermiers tch'y veulent faithe pûs d'beurre à djais ch'lins la livre.
Ach'teu, Moussieu l'Editeu, j'm'en vais vôs explitchi tchiquechose pour vôs êcliéthi au sujet du lait et du couôtage tchi y'a à gardé des bêtes de nos jours.
J'en ai trais me. Y sont hardi ben briedées, en j'en ai tait ben ordguilleux, mais au jour d'agniet ch'est des bricolles, et j'n'ai pas peûx de l'dithe.
A qu'menchi, y'en a deux à sec, et je n'sait pas pourtchi. Ben seûx tch'ils ont fait d'exprès, car ils ont ocquo trais mais à allé, et au mains y dev'thaient donné un pot ou deux par jour. Mais nânin, les tchéthoignes r'fusent d'en donné même une démié pinte. J'ai biau hallé et hallé, mais rain n'veint.
La trâisième me fait lâie mine quand j'appréche avec ma canne, mais ou fait ocquo san d'vé du mûs qu'ou peut, et y'a assez d'lait pour la Merrienne et mé, et un p'tit mio d'beurre par dessus l'marchi. Mais j'm'attends qu'y'un d'chais jours ou f'tha comme les autres et abandon'na l'affaithe.
Y'a un mais j'm'en fut en ville et j'accatit un chent d'chais nuts et un chent d'tchiquechose que nou m'dit tait du bran. J'en eut pour pûs d'trais louis, et sans doute le compte veindra yun d'chais jours, car les marchands n'donnent pas d'longs crédits agniet. Mais si ch't'îchin crai tch'il étha ses sous d'vant la saison, y s'trompe.
Ach'teu, mes trais vaques m'ont avalé dans tchînze jours les nuts, le bran et trais ballots d'fain chêtchune par jour, sans conté des raves que j'ai emprunté d'yun d'mes vaisins tch'est dêja v'nu trais fais m'dithe tch'il est à court.
Je n'sis pas à vos dithe des menn'ties Moussieu, ou savez ben qu'je n'voudrais pas faithe chonna, étant bouon Saint-Ouennais. J'vos asseûthe que l'homme tch'y garde des vaques au jour tch'il est, travâille pour le publyis et non pour l'y-même. Pour dithe vrai, le lait n'a jamais peyi. Toute ma vie j'en ai porté et j'peux dithe que si j'n'avais pas vendu une bête par bordée, y'a longtemps que j'm'en s'sais dêfait d'chais béstiaux.
Enfin, Moussieu, j'qu'menche à m'dêcouothagi, et j'm'en vais vos faithe une offre. V'nez siez-nous accatez mes vaques et emm'nez les ouêsque ou voudreuz. Je s'sait ben content d'en être dêfait, et ou pouvez l's'aver à bouon marchi - chent louis la piêche.
Ph'lip
1/3/1947
Viyiz étout: