À Portinfé,
Saint Ou.
Moussieu l'Editeu,
Sinon pour une chose, la Merienne et mé, j'éthions 'té heutheux et trantchilles, mais je n'peux pas nié que hièr un p'tit nuage s'êl'vit, et est ocquo là. Et ch'est tout d'la faute à l'Ernest Lé Cornu. Jamais j'n'éthais creu tch'il éthait voulu abandonner lé bouon vièr système du 'Bridge' dans la saison. Eh bein, Moussieu, j'mé trompais, car à la réunion à Saint Louothains, ouèsqu'i' présidit, i' dit tout net et cârré tch'i' 'tait en faveur dé chu 'Marketing Board' et à ch'teu ouèsque j'en sommes?.
"I' dit," s'fit la Merrienne, "que souos les circonstances, i' criyait que ch'tait la miyeu chose à faithe".
"Une distinction sans autchune difféthence", j'li dis "A ch'teu sans doute, lé nouvieau système s'en va être adopté, chein tchi veur dithe que touos les fermièrs éthont à accepter le même prix, tch'i' n'séthont pas combein tch'i' r'chev'thont, et qu'en autchun cas ils éthont à attendre pour lûs sous, sans saver combein longtemps. Belle affaithe, ma fé!"
"Mais, Ph'lip," ou s'fit, "i' fut dit à la réunion que dans l'entretemps l' pouôrront emprunter".
"Vèthe, sans doute," j'li dis, "mais quand un homme emprunte il est forchi de r'payi. I' n'est pas libre de dithe à ses créanciers, comme le font l's Etats, tch'i' promet dé payi quand il étha les sous. Mé, si j'emprunte une vingtaine dé louis, ou d'même, d'un vaisin, et que quand i' d'mande ses sous, je n'les ai pas, i' peut envier lé Sieur Benest ou l'Sieur Misson, autchun jour à m'donner une tappe sûs l'dos, et m'fichi en bouaite. Mais chein qu'nou peut faithe avec un individu, nou n'peut pas faithe avec un pays ou une communauté. R'garde à l'Allemagne, tch'a fait banq'route deux fais et agniet est pûs prospèthe que jamais. Même la France a fait la même chose, et d'autres pays étout. I' n'y a, pour dithe, que l'Angliétérre tch'a tréjous payi ses dettes".
"Ch'est vrai assez", ou dit, "mais, avec chonna, la 'Post' est satisfaite que notre situâtion financièthe est solide. Tu'as veu que l's Estats ont donné un vote de confianche au Cyril Lé Mèrquand et san comité".
"Vèthe," j'li dis "car i' n'y avait rein d'autre à faithe. Lé Sénateur Farley éthait-i' fait mûs crais-tu?"
"Je n'sais pas", ou dit, "mais les Sénateurs Krichefski, Crill et d'autres n'taient pas pour lé vote – n'oublie pas chonna. Même la 'Post' a ses doutanches, car ou n'peut pas vaie comment que l'Comité des Finances pouórront trouver les sous, puisqu'i' n'peuvent ni emprunter ni prêter à pûs d'chinq pour chent. I' pathait que ch'est-là ocquo la louai".
"Vèthe," j'm'accordis, "dans d's affaithes financièthes j'sommes ocquo souos la louai d'djais-sept chent séptante-yunne, et à ma veue, ch'est une bouonne chose, car si ch'tait autrement, lé comité nos mettrait ocquo pûs dans l'pité. Y'a tout-plien d'sous à emprunter à huit, et p't'être même sept, du chent, mais je n'pouvons pas y touchi."
"Et les nouvelles taxes tchi s'en vont étre imposées, tchèsqu'en est?" ou d'mandit.
"Par chein qu'j'en comprends, i'n'y en étha pas" j'li dis "Y'a assez d'sous dans l'coffrefort pour payi tout ch'qu'est prêssant, mais quant à chein tchi s'arriv'tha pûs tard, j'si aussi savant comme té."
"Ch'est-à-dithe, j'n'y connaissons rein", ou s'fit. "Ch'est pourtchi i'n'y a rein à nos gêner. Pûs important ou moment, est l'prospect d'une êlection partout l'Ile pour Sénateur, et quantchi qu'nou pouôrra s'attendre à une vacance?"
"D'vant long, j'craithais," j'li dis, "mais i' faut attendre l'assermentâtion du nouvieau Protchutheux-Général, ch'est-à-dithe du Sieur Ereaut".
"Et ch'est-i' seux que l'Peter Crill prendra?"
"Dans chu monde," j'li dis, "nou n'peut pas s'faithe trop seux d'autchune chose, mais j'si prêt à gagi que Peter est prêt à prendre la djobbe, et si ch'est d'même tu'éthas l'pliaisi d'aller voter pour l'homme de tan chouaix. Des trais qu'ont 'té mentionnés, dis-mé lé sien que tu aime le mûs".
"Nennin-dja!" ou s'fit decidemment "mais j'ai dans l'idée que des trais ch'est p't'être lé Député Venables tchi méthite la djobbe. Après tout il a fait hardi d'bouon travas pour des années"
"Et bein des choses tchi n'ont pas pliut au publyic" j'li dis "et j'si ocquo de l'opinion que l'Député Tomes veindra au haut d'la liste".
"Tu t'es trompé pûs d'une fais", ou s'fit, "et tu pouôrrais t'tromper ocquo chutte fais. Mais, Ph'lip, changeant d'sujet, tchi bouonne chose que j'avons l'Comité du Tourisme!"
"Et bein, sûs un sens, vèthe", j'li dis, "mais y nos veint dêjà trop d'chais touristes en êté, et s'il en veint pûs nou n'sétha pas iou les mettre. Dé bouonne heuthe dans l'année et un mio tard en automne, oui, mais dans l'mitan d'l'êté, nennin."
"Ch'est chein que l'comité voudrait encouothagi," ou dit, "tu'as veu chonna dans la gázette. Mais Ph'lip, crais-tu que ch'est vrai que les visiteurs dêpensent tant d'millions dans l'Ile comme y'en a tchi disent?"
"Je n'sais pas comment tch'i' caltchulent chonna", j'li dis "mais ch'est pôssiblye car les hotels et les pensions n'les prennent pas à bouon marchi et les boutitchièrs, dans bein des cas, doublyent les prix d'lûs marchandises. Mais l'temps veindra, et chonna est certain qu'les touristes voudront pûs d'valeur pour lûs sous. Et ch't affreux mât-là, au Nord, tchi n'éthait jamais deu être plianté là, n'amende pas les bieautés natuthelles. Ch'est un crime de l'aver mint-là à Frémont!"
"Oh bein," ou s'fit, "y'a une chose tch'a amendé mes bieautés à mé. Mes r'frédeuses dispathutent en même temps comme les pievies. Et la tchenne, est-alle r'faite, ou as-tu ocquo ma ouèsque-er-ouèsque tu n'voulais pas m'dithe?"
"Tout ch'que j'peux dithe la d'sûs, ma vielle", j'li raiponnis "ch'est que j'n'ai pas d'ma à ch'teu. Tchèsqu'i' y'a pour soupé?"
Ph'lip
27/1/1962
Viyiz étout: