Av'-ous un Flyitchet dans ta vie? Pouor dé mé, Flyitchet est eune pliaiche qué j'connais, mais j'n'ai janmais autcheune raison pouor y'aller.
À ches drein, la Gâzette du Sé publyit un suppliément entouor les pliaîsièrs oubliés d'eune vacanche siez sé tchi nos învitit d'èrdêcouvri des pliaiches en Jèrri ioù qu'j'n'avêmes pon 'té d'pis bein d's années - ou ofûche du tout.
Assa, les Jèrriais sont des cats d'âtre - il' aiment rester dans lus côniéthe, sans aver à dêjutchi jusqu'à l'aut' bord d'l'Île.
Y'a tchiques s'maines, jé rencontris, mé, deux danmes au Mont ès Pendus tchi n'lus sont pon janmais pronm'né d'vant là-haut. I' fûtent èrmèrvilyies par les bouonnes veues sus la baie. Et nou m'dit qu'même des juges d'la compétition des belles ruettes entre les Pâraisses avaient trouvé ch't' année des carres proposées par les meunicipalités tch'i' n'connaîssaient pon d'vant.
Pouor dé mé, j'avais rêsolu d'èrvîsiter des fîns fonds pèrdus ch't Êté. Y'a bein eune volée qué jé n'ai pon veu l'Île Agouais à Sainte Mathie. Et don j'y fus marchi avaû la sente des falaises. Combein d'fais qu'nou peut vîsiter l'Creux du Vis et la Grève dé Lé sans vaie lé p'tit but d'côte entre ches deux pliaiches-là!
J'fus à la Belle Hougue à La Trinn'té étout. J'dithais qué j'connais assez bein La Trinn'té, et chenna auve Les Pliatons, mais dgiâtre sait si j'avais janmais 'té jusqu'à la Belle Hougue d'vant. Tout coumme, nou n'est pon alloué d'pédaler sus les sentes des falaises, et né v'là coumme tchi j'ai mantchi deux'trais d'ches taques.
J'vais à Rôzé, au Coup'son, à Sainte Cat'linne, mais anichi entre ches'-là y'a Flyitchet tchi n'sembl'ye janmais méthiter la peine dé vîsiter à bike. Mais d'abord qu'nou faiche un p'tit êffort, nou peut aîsîment pâsser à pid par la sente entre la Ruette du Vèrcliut à Sainte Cat'linne et Flyitchet. La p'tite baie est trantchil'ye; la tou est assez întérêssante; et ouaithe qu'i' n'y'ait pon d'sablion, nou vait d'ilo l'driéthe d'la grande caûchie.
J'avons châtchun d'nous un pays d'cocangne. Si ch'est au seur-vouêt ou au nord-êt, i' vaut aller dênichi san Flyitchet.
Geraint Jennings
Viyiz étout: