Y'a oquo tchiq' louis d'restant dans ma bourse, et nou pouorrait duthé ichin oquo eunne huitaine si ch'nes que je qu'menche a etre gèné des nouvelles que j'oué de d'siez nous. Ch'est-tan'tchi, j'sis a q'menchi a m'prépathé pour r'vener en Jerri la s'maine tchi vint. Les siens qu'ethaient offuche idée de v'né sus la Cauchie m'faithe un 'welcome 'ome' vindront sus la Victoria a l'arrivée du baté de St. Malo: je s'ai sus l'pont, appié contre la ch'minée, parmi les gens d'la premié classe.
Ch'est grand dommage qu'nos gens n'aient pon peu s'comporté oquo tchiq' temps - j'tais a passé un divers - bouan temps ichin. Fetes et festins touos les jours, theatres et café touos les siers, et un docteu tchi m'dounne des purges francaises pour rin! J'mé sis m'esfié d'lus ieau, coumme nou m'avait prév'nu, mais y m'éthait falu oquo eunne bouonne tchinzaine pour savé l'tchet d'lus vins qu'était l'miyeu pour ma santé - l'rouoge ou l'blianc. Mais quand nou n'peut, nou n'peut! et faudra laissi chutte décision la jusqu'a la préchenne bordée.
Y m'vint des lettres pas rasseuthantes du toutsus ch'qui s'passe siez nous. J'apprends qu'nos gens sont a faithe des grandes dèspenses: qu'Laizé a té veue accater des pehannes au marchi, qu'ou mins l'aut' Dinmanche un sh'ling a la colecte; et qu'Lonore, ma fille, a té veue a la Grève de Lecq a soupé d'houmard et d'jambon ov un marchand d'poummes-de-terre qui l'avait am'née là dans un moto. Il est grand temps que j'mé rappréche.
Ch'est dommage! Y fait si diversement bon ichin! J'sis invité quasi touos les jours parmi des gens distindjis, y'a mème deux juges qu'ont promint de v'né m'vaie en Jerri pus tard dans l's'envithons du temps qu'Wilbur vindra payi ses dettes. J'vais quazi touos les jours en moto - man moto - ou en baté sus la riviéthe. J'ai 'té deux-très fais au theatre (autant vaut n'pon l'dithe a Laizé : l'theatre et yi n'sont pon pathents) et j'sis pour monté dans un ballon la s'maine tchi vint si j'sis oquo par les qu'mins.
Mais j'n'y s'ait pon! J'ai fini après ben d'l'embaras, a cliore man marchi d'ielle pour ch't'année: y'a au d'la d'très s'maines que j'sis a galvaudé, j'sis quasi a bu d'mes sous, l'Bos m'èscrit qui faudra passé nos comptes au pus tot, et j'voudrais v'né savé tchès qui m'a avroné ma fille. Pour ch'tis-la, autant vaut pour lis fiche san camp d'vant man r'tou! Si ch'est vrai la maintchi de ch'que nou m'èscrit entouore li, sa saison d'poummes-de-terre est autant dithe finie. Ou y mathietha Lonore ou j'l'èsmagliéthait coumme eunne poumme souôs un prînsea! Mais p't'etre qué j'm'èsmentiounne trop! P't'etre que man tcheu d'péthe vé du malheu la yiou qui n'y'a qu'un mio d'danji! Tout s'r'pathe a la longue, et j'espèthe qu'la réputation d'ma fille n'est pon avrônée a fin pour avé mangi un houmard ou deux ov un moussieu angliais qui y'a dounné eunne 'ride au clié d'la leunne dans san moto. J'espéthe qué nou n'en r'pâsl'la pon, et que j'trouv'thons oquo moyen d'la mathié a tchiq' buzard de bouon jerriais ov tout plien d'sous.
Piteur Pain
Morning News 14/6/1912
Viyiz étout: