Si j'me mettais à vos conté tout ch'que j'ai veu dans man viage, j'en éthais jusqu'à la Saint Michet. A bon d'vous dithaient à la fin : « Y nos fait sué avec san viage coumme, si n'y'avait qu'li qu'avait 'té hors Jerri. » J'veur bin qu'y'en ait d'auchuns d'vous qu'aient viagi l'mais combin y'en a ti qu'ont quazi accaté un motot de très chents louis sans les lanternes. Ha ! Et si y'en a d'vous qu'aient 'té si ban r'chus dans les pus grandes familles de Kérantrech ; qui vins'je nos l'dithe. Ha ! Savous tant seulment ou-ès qu'ch'est chutte ville la ? Et quand bin meme ou l'séthaites, j'sis prèt a gagi la paraplie à Laizé contre un siextounnyi d'feves que nusse de vous n'a jommais tant seulment diné siez l'Maire, Moussieu Kerlero du Crâno. Ha ! oquo eunne fais.
Ch'fut siez chu Marthis la - il est grand nobliesse, chu moussieu la ; et m'montri la hal'barde ov tchi l'preumi Kerlero fendi la tête à un prince Muzulman la bordée qu'il 'tait en dgerre dans l's envithons de Jerusalem - eh bin, ch'fut siez chu nobye moussieu la - sans Châsté est en ruines ; les pus belles ruines d's'envithons, a ch'qué nou m'a dit ; j'en ai l'portrait sus eunne « postcard »- quee j'vit des poules pus remerquablyes qu'autcheunne qu'nous ait oquo veu. « Ou viyis, Moussieu Pain, qui m'dit en m'les montrant après diné - justement, j'en avaimes manji yeunne a la fin du r'pas - ch'est sus l'profit d'ma volaille que j'me fie pour r'bati man Châsté - je s'a pour lé dounné a ma fille unique quand ou s'mathietha :- ov tchiq' chentaines de vergies de mielles a l'entou.
Pour de mé, j'n'y viyais rin d'si r'merquabye, a ses glinnes ; et j'pensi en mé mème qu'sa fille éthait bieau temps s'mouezi d'vant qu'trouvé a s'mathié souos chès conditions la. Mais quand l'Martchis m'eut explyitchi ch'qu'en 'tait, j'escalli l'siers ! Jusqu'a l'âge de siex mais, m'dit y, ses pouochins s'eslevent coumme les siens a tout l'monde. A ch't'âge la, les poulettes s'mettent a pondre ; et ne v'chin ou-ès qui d'vennent r'merquabyes. A m'zuthe qui pounnent (jommais mains d'eun oeu par jour) les poules a Moussieu du Crâno chutte sorte de poule la mange s'n'oeu. Chaque poulette, sans preumié oeu pounnu, l'mangé - en pond un autre le lend'main, l'mange - et ainchin touos les jours sans discontinué. Au bu d'un mais ou chinq s'maines, y sont dev'nus rondes, et grasses, et d'licates, qui n'en peuvent tant seulment pas caq'té sans s'appié contre tchiq'chose ; et nou les vend en ville ès maisons partitchuliettes, et jusqu'a Paris pour quatre a chinq francs la pieche, sans bardjinné. Moussieu Kerlero du Crâno cartchulle qu'chaque poulette lis ravint q pas pus d'quarante sous touos frais payis quand ou c'menche a pondre et coumme il la vend l'prix que j'vos dit sans avé despensé un aut' sou en neurtuthe ni rin, ou viyis par vous mème le profit qu'y'a, et qu'si continue assez longtemps sus chu pid la, y'etha eunne chance pour tchiq'un - et pourtchi pas un Jerriais, par chance ! - d'avé fille et châsté d'vant la fin du monde. Mais les siens qui aheuctethaient pour attendre si longtemps pouorraient avé la fille des ach'teu - a ch' qu'y m'fit comprendre - et les ruines du chasté par dessus l'marchi. Ch'est un assez bieau brin d'fille, a ch'que j'en vit, et qui s'y r'counnait a mettre des poules a coué.
PITEUR PAIN
4/7/1912
Viyiz étout: