Jusqu'ichin, nou n'tenait pas grand compte de Samuel, dans chutte maison ichin; et j'avais bin d'fendu a Lonore de s'laissi conté des sornettes par ch't'espece de badléthan - j'le considethais bin au d'sous d'nou et pauvre coumme un rat d'églyise. Coumme j'disais a Lonore, faute de mus, nou pouorait lis dounné de l'encouothag'ment, faute de mus. Mais cré mé, ma fille, "aim high!" Fais coumme ta mémée quand ou'l eut a chouési: Aim high! Nous a veu des filles de pas grand chose qui dansent sus l'stage - nous en a veu mathié des Marquis! Pourtchi qu'eunne fille de forgeux d'bouonne famille ne gaf'thait pon tchiq'chose dans les grandeurs? Et je châtchais la tête quand j'la viyais r'gardé Samuel avec des doux yeux quand il 'tait habiyi pour allé à la Chapelle.
Mais l'affaithe a changi du tout au tout! I' s'pouorait ma fingre, q'chu Samuel d'vindrait tchiq'chose, et ma fé! (extchusez l'mot) i' s'pouorait que j'lis permettrais bétot d'faithe la carre a Miss Pain!
L'aut' matin, ne v'la ti pas un grand moto qui s'arrète ichin. Dans l'moto y'avait un Améthitchin, et, l'créthaites 'ous bin, Samuel monti dans l'moto avec chu moussieu la! J'vit d'mes yeux (a travers eunne bréque du ridjeau) l'moussieu lis dounné eunne longue cigare, et s'met' a lis pâslé coumme a un amin! J'n'en r'venais pas! et j'criyi du coup a Lonore d'avé a mettr' un touffet d'flieurs sus l'ouach-stan dans la mansarde a Samuel, dé d'pis qu'il est dans la grandeu.
Moussieu Samuel (I' n'en couote pas pus d'dithe Moussieu, et nou n'sait jommais) rentri dans les djix heuthes un mio caud d'béthe, ses pouchettes de casaque pliennes de cigares, et plien mes deux mains de piches-d'èstchu dans ses pouchettes de braie! Il avait 'té au Show d'Boeus, qui nos dit, avec chu Moussieu la: et tandi qu'li et Piteur feummaient des cigares, i' nos conti sa journée.
"J'fumes au Show, qui dit: l'améthitchin voulait deus-très boeus pour shippé l'mais tchi vint, et j'tais la pour l'introduithe ès propriétaithes. "Sitot qu'les fermiers nos vites dèsbroussé dans not moto, ch'tait a tchi vindrait chatchi d'main ov mé et m'offri tchiq'chose a bethe. "Pâsle li d'man boeu qu'disait yun en m'dounant eunne pieche-d'estchu. "Amène lé siez nous" qu'disait un autre, et tu'éthas la maintchi du profit." "Vindras tu prendre tchiq'chose?" qu'disait un autre en faisant un clyin: et tandi que j'bévais à sa santé, i' m'disait qu'sen boeu 'tait par Jolly Golden et d'la bouonne vaque a Clem Pico, et qu'sis j'aidjais a l'vendre, i' m'apportethait un bathi d'nouvelles poummes de terre d'ses preunmié fouies." "Enfin! j'fut convié par quasi tous, qu'dit Samuel: et nou s'en va m'apporté d'la caboche, des oeus, du beurre, du cidre, et jusqu'à eunne foncée d'lapins. Et tous m'ont dit qu'si j'pâsle pour yeux, i' n'oubliethont pon pus tard! J'ai promins a pus d'trente fermiers que j'sa d'lus boeu que j'pâslai l'pus haut."
Quand j'fûmes couochis (ch'est au liet que j'sermounne l'pus souvent Piteur) j'lis dis: Piteur! êscoute mé bin! I' s'en va fallé faithe bouonne mine a chu Samuel la! A'ch't'heu qu'lé v'la marchand d'bêtes, et qui va en moto ov des améthitchins, chu garçon la (tout nieaumin qu'il est) s'en va faithe fortune en p'tit d'temps - dis que j'te l'dit! Ergas Ouilli Alexandre! Ergas Flip Le Bro! Ergas Moussieu Pérrée! et tant d'autres. Ne v'la du monde qu'est riche, qui gagne des sous comme des èscalles. A tchi faithe? A spétchullé sus des bètes! Y'a des maglyes de sous a gagnyi sus l'béestias! Les louis plieuvent de touos les bords quand nou monyie des bètes a cones!
"Tu m'sembye en savé d'jantrément long pour eunne femme de forgeux, s'fit Piteur. Mais, porte mé r'pos! j'ai envyie d'dormi! - Et i' m'touonni l'dos et s'mint en l'heu a ronflié que l's ozennes en trembliaient."
Mais j'ai m'n'idée tout d'mème! J'm'en vais mathié ma fille a Samuel d'vant qu'les autres méthes de famille aient vent d'la chose! Et quand man bieau-fils étha d'grandes èstabyes pliennes de bètes dans les chent a deux chents louis chaque, deux ou très motos, et qu'il itha touos l's ans en amethique: tchèes qui s'a jalouse et qui s'mordront les degts de m'zespé?
Faudra que j'dise a Lonore d'mettr' des antchies brodées ès ouotilliers a Moussieu Samuel, un morcé d'savon parfumé dans sa savounette, et eun volume du Christian Herald sus sa tabye a mitheux!
Laizé Pain
The Morning News 3/4/1913
Viyiz étout: