N'y'eut pas tant d'fonne coumme j'ai veu tchiq'fais, à chu Bantchet! Ni d'si belle compognie! Mussieu l'Baillyi n'y'était pon pour nos dithe tchès qu'en tait d'la Loué sus l'Education; L'Connon Luce n'était pas là pour nos faithe san bieau speech d'amor sus le Roué; l's'Estats 'taient bin maigrément r'presentés; l'President Aubin 'tait malade au liét, et j'ai ouï qu'a la pliéche d'etre a dîné avec nous, il avait deu résté a s'met' les pids dans du bran et la tête dans du gliéchon. Chu célèbre ex-deputé Bailhache 'tait assis dans la tchaise au Vice-President Nicolle, qu'a des r'fredeuses au g'nou - et n'y'avait pour dithe que tchiq' Recteurs et mé qu'étaient ch'qué nou peut dithe d'ornément. Ch'tait loin d'être coumme le temps passé.
J'usqu'au dîné qui n'mé semblyi pas si bon coumme aut'fais. N'y'avait pas assez d'gréevé dans la soupe; l'paîsson avait des hétheques; j'n'eut qu'eunne maigre tchêsse de vielle poule; et l'bricoli avait l'gout d'chou-flieurs. Pour dessert j'n'eut qu'eunne poumme fliètrie qu'avait des hon'tons dans l'râtchet, et y n'mîntes pon d'grog dans l'café. J'tais prêt a en plieuthé!
Par bounheu, tchiq un m'prêti eunne cigare qu'etait pas vérmoulue, et - pour béthe ès santés - j'eut l'fond d'boutelle d'un vaîsin qui s'en fut d'bouonne heuthe viyant qu'il avait laissi eunne vaque engouée siez li.
Jusqu'es speech qu'etaient enfuntchis! N'y'avait ni fond ni coupé d'dans! Y sembliait qu'chatchun avait peux d'en dithe trop long; et l'affaithe aheuctait tout l'temps. N'y'eut qu'Moussieu Pérrée qui nos dit d'tchi qui vallait la peine. J'oué haut un mio, coumme ou savez; et coumme j'tais un bouan bu d'li, j'pouorrais m'trompé un mio sus ch'qui dit. J'cré pourtant l'avé oui dithe qu'il avait vendu a trent mille Louis d'bêtes ch't'année. Pour rin au monde jé n'voudrais contrédithe Moussieu Pérrée, mais tout d'même, ch'est eunne bin forte soumme pour un seul marchand. Y pathaitrait étout qu'les fermiers ont fait d'bin bouonnes affaithes sus lus patates. Allons tant mus! tant mus! Et coumme j'ai tchiq' arrérages des comptes pour d'la féthâlle, faudra qu'j'alle faithe eunne touônée dans ma vielle paraisse.
Mais coumme j'vos dit, y'avait tchiq' chose qu'aheuctait tout l'temps, et, persounne n'eut l'air contrarié quand tchiq' un dit: "Speed the plough." Autrement dit: S'nou s'n'allait s'couochi?
J'rentri siez nous en l'heu; et Laïzé m'dounni un bieau 'welcome' et un verre caud - d'jouée de m'vaie r'venin a pi. Je n'sait pon tchi'l idée qu'ou s'était faite, mais ou prétendit pensé que je sis r'venu dans eunne chiviethe. Tchi drôle d'idées qu'les femmes se font tchiq' fais, tout d'même.
Piteur Pain
The Morning News 12/12/1912
Viyiz étout: