Va-t-en! décampe! O, vieille année maudite!
Année de gouffre et d'feu. - Men âme a hâte
D'êtr' soulagie de té. - O, march'-t'en... vite...
Année naire et honie! - Viv' ta débâte!...

Tempête et terme ont merqui ton passage -
Che sont les faibl's sus qui tu t'es l'pus rué.
Et tes douz' mais ont causé pus d'saccage
Que douz' fais douz' ne puôront erlevé.

Si tu brûlais donc tant de saccagi,
Si, malfésante, i' fallait t' dégrouté, -
N'yavait-i pas assez d'châtiaux d'papi
De qui ta foudre érait peu s'contenté?

Ch'valiers de l'ord' de l'Emprunt, déroûtés. -
Fracas de Fraude, Imposture, et Tromp'rie;
Les puôritûr's du corps vivant copées;
O, n'eut-ch' pas 'té assez, année grégie?

Nânin! D'un coup i' fallait accablié
La veuv'-victime et l'larron haut pliaichi.
Du mêm' coup tête trameuse plié
Et chell' qui dans le D'vé avait blianchi.

Casser les liens intim's d'un long passé,
Pour maîchets d'autr's faire innocents pati,
Eteindre et raisonn'nent et charité,
Confiance, espérance, paix.. mon Dieu, pourqui!

Chest c'que tuas fait, année cruell'-frondeuse -
Impitoyabl' - sans queur - sans sympathie; -
Décampe, o vielle année, sinistr'-ruineuse!
Meurs, NAIRE ANNÉE! à tout tréjours HONIE!

DEC.31, 1873.

Minniet sounnit. Ou' disparut; joignit
Les ombres de ses mères. L'out-i r'poussée?
Temps dira. Tréjous bein trop vrai est-i
Que, haut dans les cieux, Tempête signalée,
Sorte de legs - ou râleux, sombr' défi -
Fut l'dernier adieu de chutte NAIRE ANNÉE.

JAN. 1, 1874.

X.