Connaîss'-ous l'histouaithe dé Narcisse? S'lon la mythologie Grecque, ch'tait un janne homme tchi 'tait si bé qué quand i' s'êpyit r'fliéchi dans eune mathe, i' restit, mâté là coumme eune êtendpèrque à s'marmoûtheler, amouotheux d'sé-même, jusqu'à ch'qu'i' fut changi en eune quézette par les dgieux. Ch'est en tchi l'nom Latîn d'la g'zette est Narcissus et quand nou vait ches flieurs, les têtes baîssies à r'garder en bas, nou comprend aîsiment l'înspithâtion du nom.
Mais les gens sont-i' narcissistes au jour d'aniet! Nou sait bein qu'i' n'y'a dgéthe dé sgornérêsses dé cosmétique siez les danmes mais i' sembl'ye qu'achteu l's hoummes, ieux étout, n'peuvent pus r'sister ès crèmes et baumes et onguents. Et v'là qu'i' sont à lus marmoûtheler et lus mithaûder, à lus onguenner et lus r'onguenner, et à lus râser et lus èrrâser auve ches nouvieaux râseurs à trais leunmelles ou quat' leunmelles, ou préchainement sans doute, chîn leunmelles.
Lé monde, sé boule-t-i' mus quand ch'est graîssi atout d'la crème à mucrithie? S'lon l'vièr diton, bieauté sans bouônté n'est qu'vannité, mais les gens veulent garder lus jannèche pus longtemps, même si chenna veurt dithe qu'i' faut s'vouer au couté du seurgien.
I' sembl'ye qu'les cheins du Rouoyaume Unni s'font opéther pouor la cosmétique pus qu'les cheins du restant d'l'Ûrope, mais pouor achteu mains qu'les Améthitchains. Tchi partie du corps qu'ous éthêtes copée et stitchie, vous? Ou aim'thêt'-ous vos réduithe auve l'aîgue dé ch't aspithateu tchi chuche eune bouqu'tée d'graîsse dé dans l'corps?
Assa, pouor dé mé i' vaut mus s'grîsi qué s'graîssi – èrgardez l'Bouôn Dgieu, li, il a eune longue blianche barbe et viyant qu'il est eune Trinneté à san tout seu, i'n'a janmais à s'èrgarder dans l'mitheux!
Geraint Jennings
Viyiz étout: