Moussieu l'Editeu,
Hélas pour la pouôre Merrienne! mais, Moussieu, ous allez vais que si oulle est dans la minsèthe, ch'est d'sa faute, et j'sy bein seux que quand j'éthait fini ou vêrrez que j'ai raison.
Pour vos dithe, ch'tait agniet l'jour qu'oulle avait fixé pour faithe san lavage. Aut'fais ch'tait touos les Lundis, épis quand vint un temps touos les tchinze-jours. Mais y y'a dêjà tchique temps que ch'est touos les mais, chein tchi fait que quand l'grand jour arrive, y'a une raide djobbe de travas pour la bouonnefemme. Sans doute ou pouôrrait avé d'l'aide, mais la dernié vieille tchi vint laissait le linge pûs sale que jamais, et don ou fut expédiée.
Ach'teu, Moussieu, quand j'ai veu l'temps à-matin, j'n'en ai pas cru grand'chose, car dans l'ouest y y'avait un gros nuage tch'avait hardi laie-mine. J'ai dit à la Merrienne que souos les circonstances ou f'thait bein mûs de r'méttre san lavage à d'main, ou même pûs tard, quand nou pouôrrait s'fié d'avé un mio d'sec mais ou n'a pas voulu m'êcouté et s'est minse en travas tout-d'suite après dêjeuné.
“Nânin,” ou m'a dit, “j'ai arrêté longtemps assez. Si tu t'la-vais pûs souvent et qu'tu n'te mettais pas au liet avec des pids niers comme la chim'née, j'dithais, mais les lincheurs et bein d'autres choses sont dans un tel êtat, que si je n'les lave pas un pûs vite, y s'sa tchéstchon de faithe un creux dans l'gardin et d'enfouï tout. Allons, dépêche-té et veint m'aidgi à les méttre sûs la ligne une fais que je l's'éthai un mio propies.”
Ou s'y'est minse à tic-de-corps, Moussieu, et bétôt me v'là à y'aidgi à les rinchi, et dans p'tit d'temps j'en avais une rangie de pûs d'une sorte sus la ligne, mais j'avais à peine fini que ne v'là une achie tchi m'forchit d'rentré à toute hâte. Mais ch'n'tait pas là l'pièthe, car dans mains d'chinq minutes le vent se l'vit à la forche d'une tempête et la pouôre Merrienne vit san lavage dispathaître comme un fliantchet d'héthondes. Avec le vent que j'avons yeu tous l'jour, y nos a 'tait impossiblye de r'trouvé la moindre chose, mais avec ma longue-veue ch't'arlevée j'apérchu une de mes qu'minses judtchie drait au haut du grand orme sûs l'fôssé d'man vaisin, et pûs lien y y'avait tchiquechose à la bouonnefemme que nou n'mentionne pas en sociêté. Ch't'article-là est mêlé parmi des ronches et une touffe de geon et je n'crais pas tchi vaudra grand'chose quand y se r'trouv'tha dans la maison. Le réstant est s'mé d'un bord et d'l'autre dans la pâraisse et je crais tchi s'sa longtemps d'vant qu'la Merrienne se met à faithe san lavage de chu temps-là.
Assêsé, Moussieu, oulle a liut la gâzétte d'un but à l'autre, et l'ayant minse bas, oulle a voulu savé si ch'est vrai qu'la Post ne r'chet rain pour toutes chais léttres que nou vait touos les siers “Parsque”, oulle a dit, “quand y'a tchique temps, voulant m'dêfaithe de mes poules tchi n'avaient pas ponnu pour deux ou trais ans, j'mint une p'tite annonce dans les 'For Sale,' et j'en eut pour sept ch'lins et d'mi. – Pourtant y pathait touos chais correspondanse et autchune personne tch'y sait êcrithe peuvent remplyi colonne après colonne avec lûs bêtes d'idées sans peyi un sou. Peux-tu m'éxplitchi chonna?”
“Eh bein, oui,” j'ai dit. “Y n'faut pas oublié que y'a hardi d'colonnes à remplyi. Ch'est tout bon quand y'a des Shows d'bêtes ou des séances d's'Etats ou d'même, mais autrement y'a l'problème touos les jours de trouvé assez d'nouvelles, et don j'crais bein qu'la Post est bein contente de r'chevé chais léttres-là pour la hallé d'embarras.”
“Oh, si ch'est d'même,” ou s'est faite, “je sais bein chein que j'm'en vais faithe. J'm'en vais êcrithe à la Post comme chonnechin: 'Dear Sir, I have some fowls for sale, cheep and will you pleeze publish this letter. Thanking you for the hospitality of your colums. Yours Trooly, Mother of Ten.' Tchèsque tu'en crais de ch't'idée-là?”
“Pas grand'chose,” j'ai dit en riant, “mais changeant d'sujét, tu'as veu que y'a un candidat pour Juge?”
“Oui, j'ai veu chonna,” ou dit, “mais tchèsqu'y y'a d'mandé d'prendre à chu Moussieu Blampid? As-t'y yeu une députâtion?”
“J'n'y connais rain,” j'ai dit, “mais ch'n'est pas important. Y'a une chose, Merrienne, ch'est un bouon vier nom jêrriais.”
“Vèthe,” ou s'est accordée, “et y s'pouôrrait qu'ch'est ocquo yun d'mes pathens. Y m'semblye avait ouï ma mèthe pâslé d'un Blampid tch'avait mathié dans notre famille quand la Reine Victoria était p'tite fille.”
Ph'lip
1959
Viyiz étout: