Au c'menchement, Dgieu s'mînt à graie les cieux et la tèrre.

La tèrre n'avait pon d'forme et 'tait viède et par sus l'avanteur i' y'avait la nièrcheu, et l'Esprit dé Dgieu souffl'yait par sus l's ieaux.

Dgieu dit: qu'la leunmiéthe sait! Et né v'chîn la leunmiéthe.

Dgieu vit qu'la leunmiéthe 'tait bouonne; et Dgieu sépathit la leunmiéthe et la nièrcheu.

À la leunmiéthe, Dgieu donnit lé nom Jour et à la nièrcheu, lé nom Niet, et né v'chîn eune séthée et né v'chîn eune matinnée - lé preunmié jour.

Dgieu dit: qu'i' y' ait eune votte entré l's ieaux et qu'ou sépathe l's ieaux d's ieaux.

Et Dgieu fit la votte, tchi sépathe les ieaux tchi sont en d'ssous d'la votte et l's ieaux tchi sont en d'ssus d'la votte: et ch'fut ainchîn.

À la votte Dgieu donnit lé nom Ciel, et né v'chîn eune séthée et né v'chîn eune matinnée - lé deuxième jour.

Dgieu dit: qu'les ieaux s'assembl'yent dans eune pliaiche à seule fîn qu'la tèrre secque s'mouontre, et ch'fut ainchîn.

Et à la tèrre secque Dgieu donnit lé nom Tèrre et à l'assembliée dg'ieaux i' donnit lé nom Mé, et Dgieu vit qué ch'tait bouôn.

Pis Dgieu dit: qu'la tèrre donne d'la vèrduthe, d'l'hèrbe portant d'la s'menche s'lon s'n espêce, et d's arbres à frit tchi contchiennent lus s'menche. Dgieu vit qué ch'tait bouôn.

Ainchîn né v'chîn eune séthée et né v'chîn eune matinnée - lé traisième jour.

Dgieu dit: qu'i' y' ait des leunmiéthes sus la votte du ciel, pouor sépather lé jour et la niet - des sîngnes pouor mèrtchi les saisons, les jours et l's années.

Et qu'i' saient des veues sus la votte du ciel pouor êcliaithi la tèrre, et ch'fut ainchîn.

Et Dgieu fit deux grandes leunmiéthes, la pus grande pouor lé gouvèrnément du jour et la pus p'tite et d's êtailes étout pouor lé gouvèrnément d'la niet.

Et Dgieu les donnit à la votte du ciel pouor êcliaithi la tèrre,

Et pouor gouvèrner lé jour et la niet, et pouor sépather la leunmiéthe et la nièrcheu. Dgieu vit qué ch'tait bouôn.

Ainchîn né v'chîn eune séthée et né v'chîn eune matinnée - lé quatrième jour.

Et Dgieu dit: qu'les ieaux saient remplyies d'annimaux et qu'les ouaîsieaux volent par sus la tèrre et par souos la votte du ciel.

Dgieu griyit les grands monstres et châque annima tchi grappinne et tchi rempl'ye les ieaux, s'lon s'n espêce, et châque ouaîsé tchi vole, s'lon s'n espêce, et Dgieu vit qué ch'tait bouôn.

Et Dgieu les bênit, dîsant: séyiz fèrtiles et multipliez, et remplyissez l's ieaux des mers, et qu'les ouaîsieaux s'multiplient sus la tèrre.

Et né v'chîn eune séthée et né v'chîn eune matinnée - lé chîntchième jour.

Et Dgieu dit: qu'la tèrre sait rempl'yie d'annimaux s'lon lus espêce, d'bestchias et d's annimaux tchi grappinnent et des bêtes d'la tèrre s'lon lus espêce, et ch'fut ainchîn.

Et Dgieu fit la bête d'la tèrre s'lon s'n espêce, et l'bestchias s'lon lus espêce, et châque annima tchi grappinne s'lon s'n espêce, et Dgieu vit qué ch'tait bouôn.

Et Dgieu dit: faîsons l'houmme à not' înmage, s'lon not èrsembliance, et qu'i' gouvèrne les paîssons d'la mé et l's ouaîsieaux des cieux et l'bestchias et la tèrre entchiéthe, et châque annima tchi grappinne.

Et Dgieu griyit l'houmme à S'n înmage, à l'înmage dé Dgieu I' l'griyit, mâle et feunmelle I' les griyit.

Et Dgieu les bênit, et Dgieu lus dit: séyiz fèrtiles et multipliez et remplyissez la tèrre, et séyiz-en les t'nants, et gouvèrnez les paîssons d'la mé et l's ouaîsieaux des cieux et châque annima tchi grappinne sus la tèrre.

Et Dgieu dit: êv'chîn J'vos ai donné l'hèrbe portant d'la s'menche sus la tèrre, et l's arbres à frit tchi contchiennent lus s'menche, et ché s'sa du fricot pouor vous;

Et pouor châque bête d'la tèrre, et pouor châque ouaîsé des cieux, et pouor châque annima tchi grappinne sus la tèrre, dans lestchels est l'esprit d'la vie, châque hèrbe vèrte s'sa du fricot. Et ch'fut ainchîn.

Et Dgieu vit tout chein tch'Il a fait, et êv'chîn ch'tait bouôn. Et né v'chîn eune séthée et né v'chîn eune matinnée - lé siêxième jour.

Et les cieux et la tèrre et tout chein tchi y 'taient, fut finnis.

Et Dgieu finnit avant l'septième jour San travas tch'Il avait fait, et cessit San travas tch'Il avait fait avant l'septième jour.

Et Dgieu bênit l'septième jour, et l'sanctifiyit pa'ce qué ch'fut l'jour quand I' cessit San travas qué Dgieu griyit.