Trenton, Michigan,
U.S.A.

Lé 4 de mai, 1974.

Moussieu l'Rédacteu,

J'vai qu'la gâzette dé Jèrri du 21 d'mar annonce l'abandon d'eune aut' vielle couôteunme. Les Connêtabl'yes né pouorront pus êt' èrprésentés dans L's Êtats par lus Chef dé Police. I' faut êt' èrconnaîssants qu'les champions d'changement (j'allais quâsi dithe dé réformâtion!) n'ont mème pon êprouvé à aboli la présence des Connêtabl'yes étout dans la Chambre Législative. Comme i' s'adonne, j'ai r'mèrtchi qu'avau l's années ch'n'est pon souvent tch'i' n'sont pon à lus pliaiches quand L's Êtats siégent, et l'changement n's'en va pon faithe grand' difféthence.

Les Jèrriais dév'thaient êt' èrconnaîssants tch'i' n'y a pon d'partis politiques dans lus p'tit Parlément, et qu' les membres né sont pon forchis d'diviser lus louoyautés entre l's intéthéts du parti ou l'bein du pays quand veint l'temps d'dithe Pour ou Contre. En Améthique j'avons la tragédie actuelle dé la dgèrre entre Républicains (Consèrvateurs) et Démocrates (Socialistes, Travailleurs, Nègres et Malcontents), auve lé Président entre les deux feux. I' s'adonne tch'il est Républicain et qué l'Congrès (l'Parlément d'ichîn) est d'majorité Démocrate et dêtèrminné d'prendre avantage du souô-dîsant scandal Watergate - tchi n'est rein d'piéthe qué l'espionnage des Louothièrs envérs les Rôsièrs, et vice-vèrsa, quand j'tais mousse à St. Ouën - pour sé dêbarrasser d'un Président tchi battit les Démocrates honteusement à la dreine êlection. Et l'Congrès pâsse san temps à délibéther s'i' s'en va êprouver à l'faithe démissionner à la pliaiche dé sé d'menter des grands troubl'yes tchi tormentent lé pays ches jours.

En pâlant d'réformâtion j'en avons grand bésoin ichîn. À c'menchi, y'a la vente de pistolets tchi s'fait trop aîsiement. Il' ont êprouvé bein des fais à pâsser eune louai pour la réglier, la vente, mais les r'présentants des fabricants d'armés ont tréjous mènagi à graîssi la patte des législateurs pour les persuader d'voter contre. Lé résultat est eune tragédie d'tith'thie dans les rues touos les jours. I' y'iut pus d'huiptante meurtres dans la cité dé Detroit, Michigan, lé mais d'mar, et quâsi autant dans trais ou quatre aut' villes. Les gens c'menchent à aver peux d'marchi les rues au sé.

Il est grand temps dé rêpouoilli la peine dé mort. Deux-s'trais Êtats l'ont fait, mais il est tchestchionnabl'ye si nouot' Cour Suprème décid'dait pour ou contre en cas d'appel. Ch'est honteux, par exempl'ye, qué l'assâsin du Sénateu Robert Kennedy est en plieine vie dans eune prison modèrne, supposément pour la vie. J'viyais l'aut' jour tch'i' d'mandait des privilèges tch'i' n'avait pon. Et y'en a des milles dé mème dans les prisons. I' sont oblyigis d'les libéther auprès un nombre d'années pour faithe du run - ou continnuer à bâti des prisons.

Mais r'vénons en Jèrri. J'viyais dans la gâzette qué cèrtains propriêtaithes sont à cartchuler un r'vénu de huit de chent ou pus sus l'capita d'construction ou d'atchêt pour décider lé louoyi d'lus maîsons. Au prix qu'j'ai veu dreinement qu'les propriêtés sont vendues, i' s'en va êt' împossibl'ye dé trouver des locataithes Jèrriais tchi gangnent assez pour payi des louages cartchulés sus un plian d'mème. À m'n idée, ch'tait eune grand' mêprînse dé pérmett' des grand' compangnies Angliaîches d'acater et d'abattre tant d'bâtisses en ville et d'èrbâti d'nouvieaux înmeubl'yes à lus pliaiche tchi d'mandent un louoyi qu'les locataithes des vielles maîsons n'peuvent pon payi. J'sai bein, sans doute, qué ch'est l'progrès. Y'en a tchi s'en vont dithe : Tch'est tch'il y connaît, chu vièr achocre tchi d'meuthe en Améthique, entouorre chein tchi s'pâsse en Jèrri? Il' ont p't-êt' raîson. Mais i' m'sembl'ye qué Jèrri n'appartcheint pus ès Jèrriais. Et qu' l'affaithe s'en va acouo empliéthi auve le pâssage du temps.

I' faut féliciter l'Chent'nyi Buesné d'St. Hélyi pour aver attithé l'attention du Juge dé la P'tite Cour au fait qué l'Île est envahie touos l's êtés par un tas d'pérsonnes d'Angliétèrre et aut' pays pour trouver du travas, sans l'sou dans lus pouchettes, et pis tchi' faut les maint'nîn ou les renv'yer siez ieux ès frais du contribuabl'ye. Il est grand temps qu' les autorités s'en d'mentent.

J'sis êtonné d'vaie qu' quarante pour chent des mathiages en Jèrri ont lieu dans l'office de l'Enregistreux Surîntendant. Ch'est sans doute un sîngne dé chu temps modèrne tchi montre qué la sainteté du mathiage en pèrd. J'pense bein qu'un tas des jannes d'à ch't heu ont peux d'prendre lé sèrment dans l'Sèrvice du Mathiage à l'églyise (Page 180 dans la Litourgie) tchi fait châtchun des mathiés s'pathèment affirmer Pour t'avoir et te garder, des ce jour et à l'avenir, en maladie et en santé, pour t'aimer et te chérir, selon le saint commandement de Dieu, jusqu'à ce que la mort nouos sépare. Ch'est eune êvangile solonnelle dé condite pour toute eune vie ensembl'ye, mais ch'est pus aîsi d'aver un mathiage civil tchi n'encombre pon trop là conscienche affaithe dé divorcer pus tard. Comme nouos l'dit l'viér diton I' y'en a pus d'mathiés qué d'contents!

George d'La Forge
 

Viyiz étout: