Fort Lauderdale, Florida,
U.S.A.
Lé 13 dé d'novembre, 1965.
Moussieu l'Rédacteu,
Dévant tchitter la France au c'mmenchement d'septembre, j'mangis un bouan fricot d'colinmachons. Quand j'sis à l'êtrangi, j'mange comme les gens du pays, et l'colînmachon est si bouan à mangi qué jé n'sis pon ravi qu'les Français l'aiment tant. J'sis seux qué si les Jèrriais en gouôtaient, i' l's aimethaient étout, et j'm'en vais vouos dithe comment les graie!
La preunmié chose à faithe est d'ramâsser les colînmachons! La prêchaine chose est d'les laver dans deux-s'trais ieaux. Quand i' sont bein lavés i' faut les mett' dans un dgichon et les couvri atout eune fiche bouanne couoche dé sé - du gros sé peut faithe - et les châtchi comme i' faut. V'la tchi donne la chance à châque colînmachon d'êt' bein salé. Lé sé les fait dêgorgi et i' faut les laîssi d'ssous au mains vingt-quatre heuthes pour lus bailli la chance dé dêgorgi à tchoeur content! Et pis nou les r'lavent bein dans deux-s'trais ieaux et nou les r'met souos l'sé eune deuxième fais pour vîngt-quatre heuthes (à mains qu'nou-s-est prêssis d'les mangi - dans chu cas-là un d'mié-jour est longtemps assez), et nou les r'lavent acouo deux-s'trais fais.
La préchaine chose est d'mett' dé l'ieau à bouoilli. Dans l'ieau, i' faut a jouôter eune pouongnie d'sé, un ouognon, eune cârotte et deux-s-trais fielles dé louothi. Quand l'ieau veint au tchèrbouoillon il est temps d'mett' les colînmachons d'dans. I' faut les laîssi bouoilli pour eune bouanne démi-ieuthe. Quand i' sont halés d'ssus l'feu i' faut les laissi r'frédgi, et pis nou prend eune adgulle à cauches et nou' dêhale châque colinmachon dé d'dans sa cruque comme nou fait en mangeant des v'licots, et nou met les colinmachons d'un côté et les cruques dé l'aut'.
En s'passant l'temps quandis qu'les colinmachons sont à dégorgi et à bouoilli, nou c'mmenche à faithe eune sauce - ou pûtôt eune pâte atout d'l'ail, des mies d'pain, du beurre, du pèrsi copé bein p'tit, et du thŷmbre. I' faut couper l'ail en p'tits mios aussi p'tits qu'possibl'ye, et i' n'faut pon aver d'peux d'y mett' un tas d'pèrsi, et pis i' faut mêler tout ch'la ensembl'ye dans l'beurre pour en faithe eune pâte, et y' mett' eune pînchie d'sé et d'paîvre.
Quand la paté est prête, nou prend la cruque et nou met la pâte dedans et pis nou fouôrre lé colînmachon dans l'mitan d'la pâte. J'avais oublyiyé d'vouos dithe qué l'colinmachon avait raptichi hardi en l'salant et l'bouoillant, et il est bein pus p'tit qu'sa cruque quand veint l'temps dé l'fouôrrer dans la pâte. Lé fricot est prêt à ch't heu pour lé mettre au fou. I' faut rangi touos les colînmachons sus un pliat ou d's assiettes, et arrêter qu'nou s'sait prêt à les mangi d'vant les mett' au feu, car i' faut tchi' s'saient mangis cauds. Nou cauffe lé fou preunmiéthement, et nou les laîssent eune dgiêxaine dé munutes au fou pour tch'il' aient la chance dé prendre lé goût d'la pâte. I' n'faut pon les y laîssi trop longtemps ou bein lé beurre tch'est dans la pâte es'sait tout fondu!
I' faut êt' seux d'dithe à la bouannefemme dé les sèrvi cauds et en sortant du fou. Nou mange ch'la comme des v'licots - auve eune beurrée. Nous prend l'colînmachon auve la main gauche et nou l'dêhale dé d'dans la cruque atout eune adgulle à cauches. Sans doute man frèthe Sydney tch'est à La Côte et tch'est gauchet, f'thait ch'la à l'arbours, li. J'vouos asseuthe qué ch'est un bouan fricot et qu'nou peut s'en litchi les babinnes! J'crai bein qu'un tas d'monde né voudraient pon en mangi, mais jé n'pouorrais pon vouos dithe pourtchi. J'sai bein qu'y a un tas d'hêinitcheurs dans chu monde, et ch'est seux qu'y en a pus en Jèrri qu'en Brétagne dé France! Pourtant, les gens aiment lé lard, et n'y a pon pus sale qu'un couochon tch'est tréjous à pilvâtchi dans la saleté et tchi n'est pon r'gardant tch'est tch'i' trouve à mangi dans s'n auge, mais i' font des grînmaches quand nou lus pâlent dé mangi des colînmachons tchi sont hardi r'gardants d'chein tch'i' mangent. I' vivent sus la vèrduthe - d'l'hèrbe, des fielles dé bouais et d'fruit et d'lédgeunmes. Ch'tait dans un bieau gardîn d'flieurs et lédgeunmes qué j'ramâssînmes les cheins qué j'mangi l'aut' jour. Y'avait eune charmante Brétonne à les ramâsser, et j'en trouvînmes au mains un coupl'ye d'douzaines cliutés sus des paithièrs appelés des Beurrés Giffard. Ch'tait la preunmié fais qu'j'avais ouï, qu'y avait des paithes nommées pour la fanmile de ma m'mée. V'la tchi montre que nou-s apprand tchiquechose dé nouvé touos les jours si nou garde l's ouïes et l's ièrs ouvèrts!
L's anciens dîsaient qu'les colînmachons 'taient bouans pour la conseunmption et qu'y en avait hardi tchi les mangeaient crus quant i' souffraient d'chutte maladie-là. I' criyaient tch'i' clièrgissaient les poumons à m'suthe tch'i' d'vallaient ava l'gôsyi. I' faut tout d'même penser tch'i' lus halaient la cruque dé d'ssus l'dos dévant l's avaler! Jé n'crai pon qué j'aimethais les mangi crus mé-même, mais nou n'sait janmais tch'est qu'nou peut faithe dévant y' êprouver. Dgieu mèrci, j'm'en vais laîssi tchitchun d'aut' êprouver chu r'miède-là!
George d'La Forge
Viyiz étout: