Ah ma pouor' tante Esthé! était-all' manigate :
Ou' savait tout vos grêer, ferrer, couotre, et paquir;
Faire rouollo, chaudé, rôtie d'cidre, et hall'patte;
Pirot, poule, et picot, et pllumer, et couquir;
Podin, gâche, et simné, - et nouorolle et merveille,
Fllotte, et crêpe, et bignèt, n'importe, ou' les faisait;
Jamais ditè n'a tè, coum' le boeurr' de sa seille.
Ah! j'aimais les fricots de ma bouonn' tante Esthé.

Et si propre oulle était, et si bouonn' mènagiere,
Qu'ous ériez bein mangi, devrai, sus sen pllanchés;
Auv' d'la chendre souvent ou' nèttissait sen aire;
Es assiettes d'êtain, matès contre l'châchés,
Nou-s-érait peu s'mirer, de tant qu'ils étaient cllaires.
Les trancheurs, les hanâps, en rangies sus l'drécheux,
S'ils avaient 'tè muchis pour des annèes entières,
Dans baheur ou tireux, n'eraient sembllè pus neux.

Et ou' n'tait pon gog'lue, et nintout orgilleuse;
De lié-mème ou' faisait le pus de sen travas;
Et ch'est qu'ou s'trimoussait, car ou' n'tait pon piercheuse;
Trejous à tig' de corps, troussèe au d'sus du bras.
I m'semblle que j'la veit, j'étais pourtant bein p'tite.
Eh bein! avec tout ch'la, ou' prenait bein sa part
De gi et de pllaisi, ou' n'tait pon hypocrite.
Si du fane il y-avait, oulle en faisait le quart.

Ou' n'avait pon besoin de se negrer la vie,
Ni le long de ses jours de s'escllaver le corps;
Mais ch'était tout sen gout d'aimer la tracach'chie,
Et ou' n'en cêssit pon qu'au pas-d'us de la mort;
Car à la fin de fins, i' faut que tout abute,
Et nou s'enniie du train et des travaux d'antan.
La vie pour presque tous n'est que peine et que lutte,
Et parmi le p'tit d'jouée il y-a pus d'un ahan.
 

A. A. L. G.