A Moussieu P... qu'avait apportè du verjus à ELIE, Mardi au ser.
|
Je vos r'mèrcions, de bouan tchoeu, bein des fais, Le personnel et mé, chièr Moussieu P... D'aver de même, Mardi, pensè en nous En nos dounnant du verjus frais et doux. De ma compliainte où z'aviètes yeu pitchi, Quand j'écrivais qu'not' compteux 'tait rempl'yi De patates crutes, de raves et d'gros navets Mais que d'tchi bouan n'y v'nait presque jamais. Ch'tait là des grappes coumme n'y'en a pas siez tous Mais la couleur s'êclipsait devant l'goût... Et l'goût restait dans la bouoche sis longtemps Ah, Moussieu P..., coumme ou nos mintes contents. J'en fis deux parts, du verjus, chier Moussieu - Car j'ai un p'tit de socialisme au tchoeu - Les hoummes sus tchi que notr' gazette dépend N'méthitent-t-i' pon un mio d'encouothagement? Passé djiex heuthes, ils 'taient, Mardi au ser, À imprimer, à patchi, à plier... Et j'vos asseuthe qu'à la fin d'un tè jour Nou z'aime bein mus du verjus qu'des trous d'chour! Je s'parti, don, Moussieu P..., votr' présent Et l's'imprimeurs vos font lus compliment. Chein qu'ils en eudrent lus fis, je cré, pus d'bain Qu'un sermon n'fait' au pouorr' djantre qu'a faim! Et j'vos dithai que quand je r'vins sièz nous, Nos gens trouvîdrent lus part bein à lus goût... Les uns et l's'autres vos sont ercounnaissants Mercî, Moussieu! j'le r'dit en vos saluant.
|
Viyiz étout: