Les Pages Jèrriaises

Nou n'est janne qu'eune fais




L'mêtchi d'maître d'êcole peut êt' hardi dû mais souvent y'a bein d'rêcompense et tchiquefais ch'est bein amusant.

Y'avait eune fais quand l'Directeu d'l'êcole gronnit un cèrtain janne De La Haye tchi jouait à Kiss Chase dans l'bel.

“Pourtchi qu'tu fais chenna?”

“Pa'ce qué j'l'aime bein,” rêponnit l'mousse.

Et pis jé m'rapelle d'la vîsite d'un înspecteu Angliais tchi n'avait pon l'drouait dé s'concèrner auvec lé Français (lé Sieur Pithouët 'tait not' înspecteu d'Français en Jèrri).

L'înspecteu Angliais dit à iun des mousses dans ma clâsse, “Pourtchi qu'tu'as êcrit CAHIER sus tan sa d'êcole?” (l'mot Français “cahier” voulant dithe livret d'exèrcice).

“Car man nom est Colin Ahier,” rêponnit l'garçon!

Ch'tait dû dé n'pas bouffer d'rithe.


Ron Smith
 

Viyiz étout:

 

Les Pages Jèrriaises