Les Pages Jèrriaises

Le Craqueux


Avous-pon pus de chent fais
Oui se vanter un craqueux;
Tout chein qu'il a est fameux,
Ses poules valent des ouaies.

I' n'a pas une seule vaque
Qui ne donne siex pots d'lait,
Quand i' s'agit de sen fait,
Sans fin et sans cesse i' craque.

La maigreu' et la laidure
Sont les qualitès d'sen chva,
Mais criyiz pour tout chonna
Qu'il est d'la milleu nature.

Il aimrait mûx une rosse
Qu'être oblligi de marchir;
Ch'est qu'i n'aime pas à cachir
Quand i n'va pon en carosse.

Cose assez dingne de rmerque
I' ne graisse qu'atou d's os;
Dans le pus faillid'ses cllos
L'grain fait un cabot la perque.

S'i va jamais à la chasse,
Alors ous pouvez compter
Qu'il est seux de rapporter
Pour le mains llievre ou bécasse.

Ch'est à peu pres le langage
Du chein connu comme craqueux;
Tout est rare et merveilleux
Des qu'i' s'agit d'sen bernage.

P.L.
30/12/1873

 

Viyiz étout:

 

Les Pages Jèrriaises