La Méthe Marie Bouaisard, eune raide bouonne veille brodeuse,
'Tait, coumme bein des femmes, passablyément tchuthieuse!
Mais, ch'na n' l' empêchait pas d'être bein dêvouée
(Et ch'tait bein dommage qu'oulle avait un long nez)
Auve des biaux images pieux oulle avait dêcoré
Les quat' muralles d'sa salle et les siens d'san cabinet
Et parmi les frêmes-là, sus lé haut de la cheunm'née
I' y avait des changlyièrs et san boutchet d'mathiée
Oulle avait frêmé iun tchi 'rprésentait la fuite en Êgypte.
Et, dans chu portrait-là, nou viyait, sus un c'mîn,
A côté d'Saint Joseph, san bâton à sa main,
Un biau p'tit bourriquot, et montés là-dessus,
La bouonne Vièrge Marie et san êfant Jésu.
Un jour, qué, d'vant sa porte, d' la dentelle ou faisait
Un espèce de tchuré oulle aperchu s'arrêté
I' d'mandit poliment un vèrre dé ieau à béthe
Et i' voulait saver ou-est qu' 'tait lé probytèthe. . .
Tout d'meme, nou viyait bein que ch'tait un tchuré,
Mais i' 'tait habilli dans un drôle de costeume,
Il avait sus la tête un manièthe dé chapé
Sa souotanne n' 'tait pas coumme nou les vai d'couoteume. . .
Marie l' renseignit don, bein seux compliaisement,
Mais, ou n' put s' empêchi d' li d'mander hardiment
Tché qui 'tait?
D' iou qui v'nait?
Eyoù qu'il allait?
L' révérend péthe souorit
Et tout d'suite rêponnit:
- J'sis d'la Compagnie d'Jésu -
J'espéthe bein d'y trouver mon salut.
D' la Compagnie d'Jésu? èrpetait not' Mary
Qui s'sentait bein honteuse d'avait 'tait affrontée.
J'l'ai dans eune frème 'chîn sus man ais d'folyi
Tout près d'man boutchet qué j'eu quand jé m'mathyi -
Entrez 'chîn la vaie - la Compagnie d'Jésu -
Mais, je n' vos vais pas là dessus!
I' faut bein en conv'nîn, viyous, en vérité
Que 'ous n'êtes pas la Bouonne Vièrge, ni même pas Saint José!
Au mains que ous êtes tchiquebord ichîn încognito....
Ah! J'en sis seuse.... j' ai comprîns.... Ous êtes LE BOURRIQUOT!!!
|
