Les Pages Jèrriaises

Bouonne Année Chinnouaise!



S'lon l'calendriyi Chinnouais, l'année du Marmoûset c'menche lé vîngt-deux d'Janvyi 2004. S'nou pense qué l's Êcossais aiment bein lus Hogmanay car qu'i' prannent eune journée d'extra dé fête lé deux d'Janvyi châque année, tch'est qu'il en est auve les Chinnouais tch'ont du fanne pendant tchînze jours pouor lus Nouvel An?

Nou c'menche les fêtes auve eune grand' nettithie d'la maîson, et ch'est souvent qu'les us et les f'nêt's sont r'peintes auve eune bouonne couoche dé rouoge peintuthe. Pouor des Chinnouais, lé rouoge né veurt pon dithe du dangi. Nou-fait, ch'est la couleu d'la bouonne chance. I' lus ent'-donnent des présents patchis en rouoge - sustout des rouoges env'loppées d'sou.

Pouor lé Nouvel An, nou mange des domplinnes - v'là tchi d'mande d'la pratique auve les badgettes Chinnouaises, valet, pouor pouver mangi des domplinnes! S'lon la couôteunme pouor s'asseûther d'la chance pouor l'année tchi veint, i' faut sèrvi des pliats entchièrs - un paîsson entchi, un p'tit couochon entchi ou un poulet entchi, auve la tête et les pids. Un cannard sîngnifie un mathiage paîsibl'ye, et des chèrvettes garantissent d'la rithie.

La célébrâtion finnit auve eune grand' Fête ès Lantèrnes.

L'année du Marmoûset continnue jusqu'au préchain Nouvel An au mais d'Févri 2005. Les cheins nés souos chu sîngne sont s'posés d'êt' întelligents et aimabl'yes - j'sis un J'va, mé, et j'travâle du et j'sis îndépendent, mais jé n'sis pon întelligent, ni aimabl'ye nitout!

À nos anmîns Chinnouais, j'dithons - ou j'êprouv'thons d'dithe - Kung Hei Fat Tchoi! Bouonne Année!


2004

 

Viyiz étout:

 

Les Pages Jèrriaises