Aniet, au mitan du d'sèrt dé Sinaï, au pid du Mont Sinaï, i'y'a un monastéthe dêdié à Sainte Cath'rinne. Ch'est lé pus vièr monastéthe au monde et fut êtablyi dans l'chînquième siècl'ye où'est qu' Moïse vit l'Arbuste Brûlant et r'chut les Dgiex C'mandements. I'tait bâti dé rose granit (comme lé chein d'Jèrri) en chînq chent vîngt sept (527 AD) souos les ordres dé l'Empéreur Justinian et est gouvèrné par vîngt-trais mouaines dé l'Églyise Orthodoxe Grec, qui sont étout, les tchuthateurs d'la pus grand' collection des pus vielles pièches chrêtchiennes, et des icônes religieuses, à travèrs seize siècl'yes.
En Jèrri, i'y'a La Baie d'Sainte Cath'rinne, La Caûchie, La Bouaîs'sie, et plusieurs routes, comme La Route et l'Mont, auvec lé même nom. Probabliément, ches pliaiches fûtent nommées auprès la Chapelle dé Ste. Cath'rinne, auvec sa maîson du prêtre, gardîn et vivyi, bâtie d'vant mille chînq chent quarante neuf, et tchi 'tait située sus la grève, près d'la mé, à côté d'la Rue des Vivièrs, et aniet, sa site se trouve souos La Route de Ste Cath'rinne. Les ruinnes d'la Chapelle fûtent dêtruites quand la route et la caûchie, pouor lé nouvieau port dé Ste. Cath'rinne, fûtent bâties entre mille huit chent quarante-sept et mille huit chent chînquante deux (1847 –1852). Et, i'y'a étout, un diton à la Sainte, qui dit, “À la Sainte Cath'rinne, (lé vîngt-chînq dé Novembre) tout arbre craît sans réchinne”.
Qu'était'che Sainte Cath'rinne? Pouortchi sanctifiée et vénérée dans ches deux pliaiches si hardi difféthentes et si distantes?
Ou 'tait eune danme d'Alexandria en Égypte, d'eune nobl'ye naîssance, et eune chrêtchienne qui êtudiait la philosophie, les mathématiques et la rhétorique. Oulle atchusit l'Empéreur Maxentius d'être hérétique. Ni li-même, ni ses consillieurs les pus sages, pouvaient accâblier ses ardguments. Don, i' la tortuthit sus la reue à pitchelles tchi mînchit en êtînchelles à cause d'un ange, et tchi aniet, porte san nom (comme feu d'artifice, en angliais – a Catherine wheel).
Enfîn, i'la décapitit, et ou d'vînt eune hardi fanmeuse martyre. Ses os fûtent trouvés pus tard au Mont Sinaï (p't-être apportés par les preunmiés hèrmites-mouaines), et à ch't heu i'sont r'posés dans eune chapelle au sommet du Mont Ste. Cath'rinne en d'ssus du monastéthe.
Oulle est nommée comme iune des Quatorze Saintes Assistantes du genre humain parmi les saints au ciel, et oulle est la patronne des jannes fil'yes, des philosophes, des prêcheux, des théologues, des chârrons (ou faîtheux d'reues), des monnyièrs, et d'autres ouvryièrs.
Don, quand ous allez vos promener, ou cachi, alentou dé La Baie d'Sainte Cathr'rinne, pensez à la danme, qui fut tuée pouor sa fouai i'y'a pus dé tchînze chents ans, et qu'est acouo vénérée par les mouaines et les pélérîns, dans lé d'sèrt au pid du Mont Sinaï, et dans lé pus vièr monastéthe du monde.
Ralph Nichols
Viyiz étout: