Y faut que j'vos raconte l'histouèthe de chein qui s'passi dans la paraisse à mon biau cliochi à l'entouor de l'êlection pouor chantgni car y faut dithe qu'il y en avait une p'tite djingue qui étaient d'avis d'avèr une élection pouor embêter deux ou trais grands d'la paraisse.

Ch'tait le sé du nomination meeting pouor le poste de chantgni. Oprès que l'affaithe fut finie j'ouï Harold, l'sien qui dit tréjous Amen au but d'la prièthe mais qui n'en fait qu'a sa tête, j'l'oui dithe a ieun des grands d'la paraisse qu'nous aurait pu aver une grande surprinse viyant qu'il avait ieut dans l'idée d'proposi un autre candidat. Y savait bein qu'il n'y gagnerait rein mais, couomme y s'faisait, n'v'là qu'aurait été pouor embêter un miot l'ex-Connétable qu'il n'aime pon en tout.

Eh bain, fouai de Marie Hibou, chein qui disait était la pure, plaine et entièthe vérithèt car mé j'en sais un p'tit pus long, un miot d'trop p'être pour tchicques-uns. L'sien que Harold avait dans l'idée d'proposer n'en savait rein en touot et n'tait même pon au meeting, viyant que ch'est un homme qui n's'mêle pon fort d'politique et qui aime mus rester à se cauffer sièz ly que d'aller ès meetings ou aux assemblaies. Chu candidat malgré ly et chu candidat mantchi ch'tait Alfi d'Ebenhezer.

Harold ly même d'vait être le proposant et ma fingre j'aurais bein aimer l'ouïr faithe un speech.

L'p'tit Samuel du bord de Rozê était prêt à l'batchi, à chein que j'ai ouï, et d'la mare dans l'fonds de l'Egypte Walter lus donnait sa bénédiction contre l'sien qu'est v'nu d'la terre d'Egypte et qui s'en va être assermenté chantgni annièth.

Nous dit éttout qu'un Percy des terres de bas était prêt à mettre sa merche et s'il en avait été d'même p't'être que George en aurait fait autant. Dans la cour de la Chénaie p't'être bein qu'nous aurait pu faithe tchicque chose avec Bill et, au Hurel, pour seur Frainque n'aurait pon voulu erfuser.

Nous avait arrange l'papi de nomination mais y resti louogi au greffe...... dans la pouchette à Robert! J'né d'mande si va l'faithe mettre dans un frame...... pas à touomates mais un frame dore!

J'pouorrais bein vos dithe èttout pouortchi au greffe mais achteu que l'affaithe est passée n'v'la qui n'a pon grand intérêt et si j'vos douonne chès details ch'est pouor vous faithe voir que mé, touote bête que j'sis, j'savais bein que nous avait ieut dans l'idée d'faithe une élection couomme j'sais bein pouor tchi que chu papi resty louogi au greffe.

J'pouorrais vos raconter èttout tchiques p'tites scènes qui s'passites au manièth oprès l'élection pouor Député, car ieut grand festin et oprès un buan fricot chest qu'nous a hardi de d'vis. Tais ta becque Marie, et laisse nos gens grapiner lus patates en paix d'pis que touot est fini jusqu'à la préchaine bordée.