Couomme chutte pouorre Marie a faille s'rompre l'cô
Couomme chutte pouorre Marie a faille s'rompre l'cô chutte semaine les siens qui ly souhaitent jouaie... dans l'autre monde, apprendront sans plaisi que ch'n'est pon encouorre chutte fais qu'nous pouorra dithe que sa fin est la paix! Nennin, et si oulle est un miot bruisée, la becqne marche tréjous et y ly reste encouore des plieumes sus l'corps pouor voltigi... et écrithe son gnollin.
* * *
Tchès que Marie s'en va nous raconter au sujet de chutte assembliaie ecclésiastique à St. Ou, quant touot fut capsizé. Oulle va vous raconter la pure, pleine et entièthe vérithèt.
Pouor seur n'v'la qui fut une grande surprinse mais si By Gad avait été un p'tit pus smart il en aurait ieut vent tchiques jours de d'v'ant et ne se s'rait pon empressi a commander des rafraîchissements qui restites sus la table dans ieun des appartements à Mess Alexandre.
Ch'tait la séthèe qu'ils taient à examiner les comptes et couomme nous trouvait que de payer tchinze chelins par jour était d'trop, By Gad s'fit que pouor l'année tchi vint y n'donnerait pon pus de dièz chelins mais personne n'dit mot car les siens qui auraient pu dithe tchique chose savaient bein chein qu'ils avaient dans l'idée de faithe.
Pouor dithe la vérithèt l'affaithe fut bein arrangie et a trais heures de l'arlevée l'jour de l'assembliaie, nous couommenchi a buougi.
Quatre taxis furent commandés et juste d'vant l'heure du meeting ils arrivites chergis de gens qui ont drouait à l'assembliaie mais qui n'y viennent que des bordées d'même.
Arthur du Coin, l'sien qui goyette un miot, v'nait de d'mander à un amin s'il allait y aver du changement quant y vit touot chu monde s'déshaller et y s'déshalli d'l'autre bord, y faut craithe, car je n'l'vit pon au meeting.
Par la gazette vous avez seu chein qui s'passi au meeting et couomment que l'affaithe touorni.
Achteu y faut que j'vos raconte chein qui s'passi oprès.
Quand toute la crowd s'rendit à côté, pouor s'rafraichir un miot, Mess Alexandre barri la porte d'ieun de ses appartements avec ses bras s'faisant, est premiers qui entrites: Ch'est d'l'autre bord, Messieurs. Chut appartement est pouor les siens d'l'autre parti. Et quand nous dit à Philip chein qu'il en était et qu'il n'avait pon besoin de réserver chut appartement y n'voulit pon y craithe touot d'abord.
Tandis que nos gens étaient à lus rafraichi, touot Morville tressautait mais ch'n'tait pon de jouaie chutte fais car by gad nous était mârri et fouai d'Marie Hibou il y avait d'tchi èttout pouor être servi d'même oprès avec servi la paraisse d'son mus.
Le lendemain nous alli clairgi les livres et tout chein qui s'trouvait dans l'banc car n'v'la qui servira pouor l'culte dans l'église de la paraisse d'a côté. Et Moussieu l'Recteu entendit une leçon qui n's'trouve pon dans l's'Ecrituthes, pouor seur.
Il y en avait d'autres de mârris èttout et j'en connais ieun qui s'fit: Tui-tui! n' v'chein vos titchèts puisque ch'est d'même car quant à mé pas ieun je n'vendrais.
Tom ly s'fit que pus d'autre il n'prêterait son van pouor le picnique du choir.
Il y en a dans chutte paraisse qui disent que l'affaithe s'en va ès tchans pour nommer un gratteur d'routes comme collecteur d'aûmônes. Mé, j'n'sis pon d'lus avis viyant qu'un gratteur d'routes peut touot aussi bein que n'importe tchi gratter les sous pour la collecte! Et pis avec James, y s'ra tréjous à l'heuthe viyant qu'il est l'milleur carillon pour reveillir les piercheurs et Moussieu l'Recteur l'sait bein èttout! Ver y s'ra d'l'assembliaie et pourra aller à touos les meetings s'en aver à s'dérangi d'trop.
* * *
Dans la paraisse du Captain qui n'a jamais été en mer, j'crais que si nous avait laissi l'sien des China Quarrie d'viser couomme il le voulait au dernier meeting qu'il y aurait ieut une bordée d'fun.
Faut dithe qu'achteu nous n'est pon d'humeuth d'rithe car chutte fais ch'n'est pon un rât à 1/7 le quartchier qui faudra et si nos gens en sont tchites pouor deux chelins ils n'airont pon à lus plaindre.
Oprèt touot à tchi la faute si l'affaithe est d'même et chutte année y faudra payi pouor la farce d'l'année passée et un p'tit peu pus pouor payi l's'intérêts à la banque.
_____________________
(Nous publierons dans notre numéro de Samedi prochain les dires de notre babillarde au sujet de la “triste” affaithe de Maître Cliem, d'la paraisse au Maître des Près).
Marie Hibou
1924
Viyiz étout: