Dans les septante membres lus rêunîtent vendrédi, lé 27 d'août, dans la Salle Pârouaîssiale dé St. Jean. Lé Vice-Président, lé Sieur J. N. Richard, prînt la tchaîse à c'menchi et la Ségrétaithe liut - lé rapport du sèrvice annuel et lé sien dé la visite des danseurs dé Dgèrnésy au mais d'juillet. Chînq nouvieaux membres fûtent êlus et la correspondance fut liue.
Les affaithes finies, lé restant d'la séthée 'tait dans les mains du Conmité Social et Mde. L. Bichard d'mandit à Mde. Joan Stevens dé prendre la séthée.
Mde. Stevens dit qu'ou 'tait bein contente d'aver 'té d'mandée dé v'nîn pâler ès membres et qué san discours s'n allait être en Français, lé sujet étant les pèrquages, les anciens c'mîns dé sanctuaithe qui mènent dépis les églyises pârouaîssiales à la mé. I' 'taient les c'mîns par tchi qu'les crînminnels s'êcappés en tchittant l'Île pour bouan. Les crînminnels 'taient alloués d'rester neu jours à l'églyise dévant lus en aller à travèrs la mé, nou suppose en France.
Lé preunmyi dé nos auteurs à en pâler fut Poingdestre en 1680 et i' dit qué les c'mîns c'menchent à châque églyise pârouaîssiale en allant par la pus courte route à la mé. Coumme les membres vîtent, ch'tait pas tréjous la pus courte mais bein souvent i' suivaient les ruissieaux. Lé c'mîn est unique à Jèrri et n'existait pas même en Dgèrnésy. Quant au mot “pèrquage” i' nos est dit qué ches c'mîns étaient 22 pids Jèrriais et 24 pids Angliais d'laîze. Ch'est pôssibl'ye qué lé bâton fait sèrvi coumme m'suthe était app'lé la pèrque et a donné san nom au c'mîn.
Dans l'temps dé la Réformation ches c'mîns cêssaient d'être faits sèrvi, et auprès chenna l'usage fut aboli auvec touos les autres traces du Catholicisme. I' fûtent ressuscités duthant les chînq ans du règne dé la Catholique Marie Tudor. Ch'tait à St. Martîn en 1546 qué Thomas Le Seelleur s'êcappit, peut-être lé dernyi à prendre ch't' occâsion à part dé duthant les chînq ans dé la Reine Marie.
Il est seu à bein près la route prînse par les pèrquages dans huit pâraisses et la route probabl'ye dans deux cas, mais pour les deux autres j'savons pas du tout. Il existe un deuxième pèrquage dans ieune des pâraisses, coumme les membres vItent quand Mde. Stevens les montrit la route sus la carte.
Coumment qu'nou peut les dêcouvri? Ch'est difficile et tchiquefais împossibl'ye, mais y'a deux moyens, dans les r'cords et sus pliaiche par lé nom d'un clios ou un côti.
En 1663 lé Rouai Charles II fit don à Messire Édouard de Carteret, fis Philippe dé St. Ouën, dé touos les pèrquages et tèrres vacantes; les tèrres vacantes étaient les siennes pas tchultivées, pûtôt les mielles. Messire Édouard né d'meuthait pas dans l'Île et s'mînt à les vendre. Sa soeur Anne, Madanme Brévint, continuit à les vendre - et même en 1715, les p'tite-filles dé chutte Anne. D'habitude ch'tait les propriêtaithes des clios vaîsîns qui l's acataient. En r'gardant dans les r'cords nou peut trouver bein dé ches transactions, mais dans tchiqu'eunes des pâraisses i' sont absentes. Plusieurs dé ches pèrquages, sustout à St. Ouën, St. Louothains et St. Pièrre, ont 'té tracés par les membres dé La Société Jèrriaise dans l'pâssé car i' déveinnent pus en pus difficiles à trouver naturellement.
Mde. Stevens explitchi lé pèrquage dé châque pâraisse et ioù qu'i' mène, c'menchant auvec St. Brélade, qu'est lé pus court dé tous. Pour St. Cliément n'y a pas dé r'cord, mais y'a raison dé craithe qu'i' va directément à la mé. St. Hélyi est simpl'ye et court, pâssant ava Lé Pèrquage (“Castle Street”) et pour la mé. St. Jean, iun des pus longs, rencontrait lé sien dé Ste. Mathie, probabliément au sud du Moulîn dé Gigoulande. Lé pèrquage dé St. Louothains allait ouêst, et pis sud, rencontrant les siens dé St. Jean et d'Ste. Mathie, allant les trais à la mé à Bieaumont. St. Martin lé Vyi allait nord dépis l'églyise, Les Vaux, lé Moulîn dé La Perrelle et rencontrait la mé près dé la tour Martello. Lé c'mîn dé St. Martîn dé Grouville allait peut-être directément à la mé, mais y'a raison dé craithe qu'il allait nord, trouvant la mé à Gouôrray. Ch'est cèrtain qué l'pèrquage dé Ste. Mathie tchitte l'églyise allant sud, rencontrant lé sien dé St. Jean et pis lé sien dé St. Louothains.
Cèrtaines gens disent qué y'avait deux pèrquages à Ste. Mathie, mais i' n'existe pas d'preuve. Lé pèrquage dé St. Ouën 'tait assez direct, pâssant nord dé La Mathe au Seigneu, mais i' sembl'ye qu'i' y'en a deux, l'autre directément dépis l'églyise à La Grève dé Lé. Y'a un p'tit c'mîn au Haut du Mathais au jour d'aniet et connu coumme Lé C'mîn du Probytaithe. Lé pèrquage dé St. Pièrre né suit pas sa propre pâraisse et dêbouche dans la baie dé St. Aubin. Ch'est pôssibl'ye, mais n'y a pas d'preuve, qu'les pèrquages dé St. Saûveux et d'La Trinneté s'rencontraient et dêbouchaient au Dicq.
Pour fini, Mde. Stevens dit qué j'avons ichîn un “droit” unique à Jèrri, aboli dépis quat' chents ans mais les preuves existent à nos jours et dans les noms des lieux, nos témoignant l'existence et l'endrait.
Mde. Stevens avait prépathé trente portraits pour les membres à d'vinner, où'est qu' ch'tait et tchi qu' ch'tait, coumme exempl'yes, Lé Rât à St. Louothains; la crouaix dans la muthâle à “Wrentham Hall”, St. Martîn; Les Colombiers, Ste. Mathie; Lé Pinnacl'ye; Lé Châté Lisabé.
Mde. L. Bichard èrmèrcyit Mde. Stevens pour san discours et l'intérêssante séthée qu'oulle avait donné et li présentit eune belle pliante, qué Mde. Stevens apprêcyit hardi.
[Lé Sieur Richard èrmèrcyit lé Président pour l'usage d'la salle acouo eune fais.]
Lé Président étout èrmèrcyit Mde. Stevens pour la bouanne séthée et Mde. Bichard et san conmité, et dit qué L'Assembliée 'tait beinv'nue à St. Jean en autchun temps.
1976
Viyiz étout: