|
Les Pyramides fûtent bâties dans lé d'sèrt Par des escliaves lachis pouor lus travas; Les Victoriens bâtîtent eune maîson d'vèrre Qu'nou mênommit “lé Palais dé Crista”; La Muthâle dé Bèrlîn fut pitchie bas Ouaithe qu'ou fûsse gèrmanniquement chînmentée; La Tou d'Eiffel fut construite en méta; Mé, j'm'en vais bâti un bouanhomme dé né. Achteu nou pâle d'învâsion et dé dgèrre; Nou-s'obéit ès c'mandes du génétha; Nou dithait bein qu'lé temps est hors d'êtchèrre, Qu'lé monde est happé dans eune trappe-à-rat. Si j'avais 'té cap'tainne ou amitha, J'éthais aimé mus dêcliather la paix, J'éthais mîns fîn à tout ch't êcalifias. Mé, j'm'en vais bâti un bouanhomme dé né. La tèrre est blianche, les clios sont touos couvèrts; I' fait bein fraid, j'avons même du vèrglias; J'n'ai pon d'traîné - j'n'ai pon, nitout, dé chèrs; Jé n'dév'thais pon tchitter man p'tit mat'nas. Faithe du travas? Chenna f'thait rithe les cats. Mais j'dais construithe eune défense contre l'armée. Chein qu'i'm'faut vraînment, ch'est un êpeûthas; Mé, j'm'en vais bâti un bouanhomme dé né. Papa Noué, stoffe les présents dans tan sa, Et flianque-les, bein dû, ava la cheunm'née! S'i' sont brûlés... v'là tchi n'fait pon grand ma; Mé, j'm'en vais bâti un bouanhomme dé né.
Geraint Jennings
|
Viyiz étout: