Lé Dîner Annuel eut lieu, Vendrédi l'23 d'Janvyi à l'Hôtel Royale, St. Hélyi. J'feunmes hardi favorisés d'aver Moussieu C. S. Harrison, Député-Bailli, auve nous.
D'vant c'menchi lé r'pas, lé Sieur Arthur Querée nos fit la priéthe, et parmi nous j'avions, Moussieu R. H. Le Masurier et sa danme, lé Juge Orange, lé Juge E. J. Syvret et sa danme, les Juges Sarre et Falla dé l'Assembliée d'Gèrnésiais et iun d'lus membres, le Sieur S. D'Aubert.
Un coup lé r'pas fini, lé Président, lé Sieur C. P. Billot, proposit la Santé d'la Reine, not' Duchêsse, et auprès chenn'chîn Moussieu Harrison nos fit un magnifique discours qui fut hardi appréchié. I' paslit parmi d'autre choses des viers poètes du Jêrriais - Maît' Jean Picot, G. W. de Carteret, E. J. Luce et l'sien d'ach'teu, lé Sieur F. Le Maistre. En rêponnant, lé Sieur Billot fit référence ès Présidents d'Honneu, les Mêssieux S. G. Crill et H. Le R. Edwards et r'mèrcyit l'Don Balleine pour la somme qu'i' donnaient touos l's ans pour souôt'nin la production du Bulletîn.
La Dlle. Ann Richard présentit un magnifique touffet d'flieurs à Mme. L. Billot.
Moussieu Ph. Ahier, B. ès S., en proposant la Santé des Officièrs, èrmercyit l'Président pour nos aver m'nés dans l'bouan c'min duthant l'année. Mlle. Emma Syvret, la ségrétaithe, l'Sieur Ph. Le Moignan, l'trésoryi, et s'n assistant, l'Sieur J. N. Richard, qui travaillaient tous si du, et touos les membres des Conmités qui les supportaient. I' paslit hardi du Bulletîn qué l'Sieur Le Maistre rédigeait, et dit comment qu'i tait liu et apprécié partout l'monde, et qué l'Sieur Le Maistre et s'n assistant, l'Sieur Max Lucas méthitaient d'être bein r'mèrciés.
Lé Sieur H. M. Gibaut et la Dlle. Syvret rêponnitent à Moussieu Ahier, et auprès aver conter un mio d'niolin la ségrétaithe ermèrcyit les membres pour lus support duthant l'année.
Lé Sieur J. N. Richard en proposant la Santé d'l'Assembliée d'Dgernésiais, dit comment qu'j'avions 'té si bein r'chus par ieux en 1957, et qu'j'espéthions tous d'pouver lus r'touaner l'complyiment pus tard, et finit san discours en paslant en d'Gèrnésiais.
Lé Juge Sarre rêponnit et r'mèrcyit pour s'n învitation et pus tard învitit l'président et sa danme à lus Dîner, l'5 d'Févri.
En finissant les discours le Maître dé Cérémonies, l'Sieur F. Trachy, dit qué y'avait trais choses à considéther quand nou' faisait un discours - 1er, d'sé l'ver pour être veu; 2e, pasler haut pour être entendu; 3e, sé taithe pour être apprécié.
Auprès chenn'chîn les gens lus assiévîtes ès tablyes pour eune gamme dé cartes et à la fin Mme. Billot présentit les prix ès gagnants.
1959
Viyiz étout: