Soupe d'Andgulle.
Paîsson.
Poulet Rôti.
Patates et Lédgeunmes.
Salade de Fruits au Champagne.
Fromage et Galettes.
Café.
Cidre, Bièthe ou Limonade.
Lé Président, lé Sieur Chs. Billot, proposit la santé dé “La Reine, Notre Duchesse.” Ensuite la santé d'l'Assembliée fut proposée par lé Sieur Frank Trachy. Sadie Le Sueur présentit un magnifique touffet d'flieurs, en rouoge et blianc, à Mme L. Billot.
Lé Président rêponnit en disant comment qu'i' 'tait content qué lé Sieur Trachy 'tait avec nous, car, l'année passée, i' fut empêchi d'y v'ner a cause de maladie. Ch'tait un pliaisi dé vaie qu'il avait ertrouvé sa bouanne santé, et qu'i' pouvait erprendre sa pliaiche parmi nous, comme aut'fais.
Ch'tait un grand d'sappointement dé n'pas aver nos deux Présidents d'Honneur auve nous, à cès sé, à cause dé raisons d'santé.
Lé Président dit comment qué touos les membres avaient dêpiet d'entendre qué lé Sieur Reg. Cabot, iun d'nos membres fidèles, était siez-li, étout, empêchi dé v'ner au Dîner par maladie. I' d'mandit à la Sécrétaire de l'i êcrire eune lettre pour exprimer les bouans souhaits dé l'Assembliée.
Lé Président, dans son discours, dit qu'il avait à r'mèrcier Moussieu S. G. Crill (Président pour les deux dernières années), qui 'tait tréjous prêt à v'ner à notre aide; et lé Sieur G. W. Bertram, qui s'sait r'tiré après quatre ans comme Trésôryi, et qu'avait travâillyi pour l'Assembliée dépis lé c'mmenchement.
Moussieu Frs. Hacquoil, proposit la santé dé la Sécrétaithe, Mlle Lucille Picot, et du Trésôryi, le Sieur Raymond Baudains. Ensuite Helen Perchard présentit son touffet à Mme
Amelia Perchard, Sécrétaire-Assistante.
Mlle Picot ermèrcyit les membres dé l'Assembliée pour lus charmant geste et ou dit comment qu'i'avait dé bouans travailleurs dans les Comités - par exemplye: Lé Sieur Frank Le Maistre, qui, tout modestement, fait un travâs d'immense valeur, car, ch'est l'i qu'est responsablye pour la publyication du Bulletin. I' faut réaliser qué l'Bulletin ch'est la lumière dé l'Assembliée, qu'éclaire dé près et dé loin, et eune manière dé faire des contactes hardi importants.
La Sécrétaire liut, dans des cartes èrchues du Sieur
George F. Le Feuvre, dé l'Amérique, et dé Moussieu A. J. Le Gresley, Sécretaire du Jersey Canadian Club, lus bouans voeux pour lé succès de l'Assembliée dans 1956.
Lé Sieur R. Baudains, en r'mèrciant les membres, dit qu'i' n'avait pas ieu l'intention dé prendre office si tôt, mais, eune fais êlu, i' f'rait d'son mus pour l'Assembliée.
Lé Président dit qu'i' voulait ermèrcier, tout spécialement lé Sieur J. W. Le Breton, Sécrétaire du Comité Social, pour tout son travâs d'organisation et d'préparation, et pour les soins d'vente dé billets, etc. Dans tout ché qu'i' fait, il est pliein d'enthousiasme.
Et, finalement, en présentant lé Sieur Ph. de Caux, et sa dame, lé Président lus offrit les r'mèrciements dé toute la compagnie et lus félicitations pour aver préparé et servi un si bouan dîner. Ch'tait vraiement un succès gastronomique.
Pour fini la sérée, les tablyes fûtent clièrgies, et n'ou's mînt à jouer ès cartes. Ch'fut eune scène hardi animée et l'temps s'pâssit bein trop vite. Mme Crill présentit les prix ès gangnants. Né v'chin les résultats:
Mme Badier, 1er prix pour dames. Mme G. D. Laurens, 2ième prix; Moussieu Frank Luce, 1er prix pour hommes; lé Sieur Alfred Slous, 2ième prix.
Lé Président annoncyit qué la prêchaine rêunion éra lieu Vendrédi, lé 24 dé Févri, dans la Salle Parouaîssiale dé St. Ouen, et prendra la forme d'un dêbat.
1956
Viyiz étout:
Pour lé 4ième dîner dé l'Assembliée d'Jèrriais, les membres sé trouvîtent à l'Hotel dé la Belle Etoile, St. Jean, Vendrédi au sé, lé 27 janvyi. Lé temps n'tait pon propice, car i'y avait eune vilaine biâse, épaisse comme des ridgeaux, ché qui fît qué n'ou 'tait content d'arriver, enfin, en veûe d'la Belle Etoile, car, pour en dire la vérité, i n'y en avait pas ieune dé vîsiblye dans tout l'firmament!