Lé 24ième dîner annuel eut lieu jeudi, lé 5 dé févri, à l'Hôtel de France. Dans les 164 membres et neuf anmîns de Dgèrnésy lus y rêunîtent.
D'vant lé r'pas, lé Député G. N. Simon, “maître dé cérémonies,” d'mandit au Sieur J. N. Richard dé faithe la priéthe.
Un magnifique dîner dé siex assiettes fut hardi bein sèrvi et, auprès, lé Sieur Simon d'mandit au Président, lé Connêtabl'ye W. J. Tomes, dé proposer la santé dé Sa Majesté la Reine, Notre Duc.
Auprès tchiques minutes, les autres santés fûtent proposées, à c'menchi auvec lé Juge Henry Perrée, qui proposit la santé dé L'Assembliée d'Jèrriais en disant qué ch'tait bein pliaîsant pour li et sa danme d'aver 'té d'mandés et r'mêrcyit L'Assembliée pour lé magnifique èrpas et la bouanne compangnie.
Lé Juge pâlit dé l'origine du Normand y'a 1100 ans, et nommit plusieurs langues qui lus sont trouvées pèrdues manque d'organisation coumme la nôtre, Lé monde disent qué l'Jèrriais né sèrt pas, mais quand nou vait des monuments, coumme Lé Mont Orgueil, Lé Châté Lisabé, La Rocco et d'autres pliaiches, i' sont prêsèrvés car ch'est historique. La langue méthite être prêsèrvée. L'Angliais est pâlé partout. Pour tchi raison qué nou tchit'tait à pâler lé Jèrriais?
Quand eune pèrsonne est ancienne et faibl'ye nou crie à un docteu. Eh bein, ch'est ch'la qu'L'Assembliée a fait. Lé Dictionnaithe a sauvé la vie du Jèrriais et les Bulletîns d'Quart d'An acatés et env'yés partout l'monde. Moussieu Perrée félicitit lé Docteu F. Le Maistre et lé Sieur Max Lucas pour tout lus travas, et espéthait qué coumme L'Assembliée allait sus sa 25ième, ou s'sait renforchie. I' souhaitit tout l'mus pôssibl'ye à L'Assembliée et finit auvec tchiques histouaithes qu'amusit tout l'monde. Lé Juge d'mandit ès membres dé lus l'ver et béthe eune santé à L'Assembliée d'Jèrriais.
Auprès, lé Président rêponnit à chutte magnifique santé et èrmèrcyit lé Juge Perrée pour san discours et tout chein qu'il avait dit. Ch'tait un grand honneu d'aver tchiqu'uns coumme lé Juge Perrée v'nîn et prendre un întéthêt. Lé Président d'mandit à tous de rêsèrver lé 23 d'novembre pour lé 25ième dîner et continuit par dithe qu'i' fallait aver des séthées coumme lé dîner, des jeux d'cartes, dêbats, etc., pour garder touos les membres heutheux et lus donner un mio d'rêjouissement et en même temps garder la langue en allant. Lé Président finit auvec tchiques histouaithes et èrmèrcyit lé Juge Perrée pour être v'nu avec sa danme.
Lé Sieur John Picot, dé la Trinn'té, fit un magnifique discours en proposant la santé des officièrs, et dit qué ch'tait un honneu pour li d'être à la tabl'ye dé haut. I' c'menchit auvec eune histouaithe d'eune vacance qu'il avait pâssé en France, et tous appliaudîtent. Lé Sieur Picot dit qué L'Assembliée dévthait être èrconnaissante d'aver des officièrs coumme lé Président, lé Connêtabl'ye W. J. Tomes; les Vice-Présidents, les Mêssieux J. N. Richard et R. H. Le Cornu (Juge) et les Dlles. K. Le Boutillier et F. M. Hacquoil; la Dlle. Ruth Amy (Ségrétaithe) et s'n assistant, lé Sieur Colin Vibert; lé Sieur B. J. Amy (Trésôryi) et s'n assistant, lé Député G. N. Simon; lé Conmité Exétchutif et les souos-Conmités qui gardent l'affaithe en allant et travaillent hardi à tâchi d'faithe dé tchi difféthent, et garder l'întéthêt dans les rêunions mensuelles.
Lé Juge R. H. Le Cornu rêponnit à la santé d's officièrs et èrmèrcyit lé Sieur Picot. I' dit qué les membres 'taient bein contents dé les aver auvec L'Assembliée. L'Assembliée n'a pas assez d'jeunes membres pour la garder en allant. I' les faut pour renforchi L'Assembliée. Lé Juge finit auvec eune histouaithe qu'amusit toute la compagnie.
La santé dé L'Assembllaïe d'Guernesiais fut propose par la Ségrétaithe, la Dlle. Ruth Amy, qui c'menchit par faithe la beinv'nue ès Dgèrnésiais qu'étaient v'nus. La Dlle. Amy félicitit Mde. Heaume pour aver 'té rê-êlue Présidente dé L'Assembllaïe d'Guernesiais et coumment qué ch'tait un pliaîsi dé r'chéver des nouvelles dé Dgèrnésy. Mais ch'tait auvec èrgret que L'Assembliée avait entendu du décès dé Moussieu Fred Torode, iun d'lus Vice-Présidents, et lus offrit les sympathies dé L'Assembliée. La Dlle. Amy dit qué les membres avaient trouvé les livres dé “Chansons et danses” bein utiles et ou souhaitit à touos les membres dé L'Assembliée d'Jèrriais bouanne santé et toute prospéthité pour 1976, et d'mandit à tous dé lus l'ver et béthe à la santé dé L'Assembliaïe d'Guernesiais.
Mde. Heaume, en rêponnant dé la part des Dgèrnésiais, èrmèrcyit les Jèrriais pour lus beinv'nue et dit qu'ou 'tait contente dé y vaie plusieurs Dgèrnésiais châque année. Mde. Heaume învitit L'Assembliée d'Jèrriais au mais d'septembre pour pâsser un jour auvec ieux en Dgèrnésy, et dit qué ch'tait magnifique qué y'a eune “entente cordiale” auvec les Normands. Ou racontit qué l'Professeur Patrice Brasseur avait fait des r'chèrches en Dgèrnésy entouor la langue et qu'i' veindrait en Jèrri ch't année. Lé Professeur R. Lepelley, dé l'Université d'Caën, 'tait à li'-aîdgi.
Mde. Heaume èrmèrcyit la Dlle. Ruth Amy pour ses patholes, et pour lé magnifique èrpas qu'avait 'té sèrvi.
Auprès, lé Député G. N. Simon d'mandit ès danmes J. Perrée, H. Tomes, D. Heaume, la Ségrétaithe et lé Trésôryi dé lus l'ver pour des présentâtions.
Lé Sieur Meiklejohn et san personnel fûtent èrmèrcyiés pour lé r'pas et lé Président èrmèrcyit lé Député G. Simon pour aver agi coumme “maître dé cérémonies”.
Lé restant d'la séthée s'pâssit bein trop vite auvec d'la musique par lé Sieur Alan Mollet et san trio, tchiques chansons par lé Sieur Garnet Perchard et la Dlle. Ruth Amy, et la compagnie. Y'eut eune râfliéthie, et les prix fûtent présentés par Mde. H. Tomes. Chenn'chîn am'nit eune bouanne séthée à sa fîn, et tous lus étaient rêjouis hardi.
1976
Viyiz étout: