Lé dînner annuel dé L'Assembliée d'Jèrriais eut lieu à la Grand Hôtel, jeudi, lé 7 dé févri, et 136 membres et dgiex anmîns dé Dgèrnésy lus assiévîtent à un mangnifique èrpas. D'vant c'menchi, la Dlle. Audrey Le Feuvre, maître dé ceremonies, d'mandit au Sieur K. W. Syvret dé faithe la priéthe. Lé r'pas fut divèrsément bein sèrvi et d'vant l'café, lé Président, lé Sieur J. N. Richard, proposit la santé dé Sa Majesté la Reine, nouot' Duc.
La santé dé L'Assembliée fut proposée par lé Sieur Michael Vautier, tchi amusit tous duthant san discours. I' dit qué ch'tait un pliaîsi et un honneu pour li d'aver 'té d'mandé. L'Assembliée avait 'té formée dans les 30 ans et avait gardé lé Jèrriais en allant. Lé Jèrriais es'sait en allant acouo tchiques jours auprès lé magnifique èrpas qué tous avaient ieu. Auvec les objets dé L'Assembliée dé garder la langue Jèrriaise en vie, l'êffort des membres, l'usage et la consèrvâtion, lé Jèrriais es'sa en bouanne santé pour acouo longtemps. Lé Sieur Vaûtchi racontit tchiques scènes et, auprès, d'mandit à tous dé béthe à la sante dé L'Assembliée d'Jèrriais.
Lé Président rêponnit et èrmèrcyit lé Sieur Vaûtchi pour la manniéthe qu'il avait proposé la santé. Lé Sieur Richard dit qué ch'tait un pliaîsi dé vaie deux Présidents d'Honneu auvec ieux, mais ch'tait èrgrettant dé saver qué l'traîsième 'tait malade, et la Ségrétaithe fut enchèrgie d'êcrithe au Sieur C. P. Billot dé la part des membres. Y'avait ieu hardi d'travas fait pour L'Assembliée par les Présidents d'Honneu et à cause dé ch'la oulle 'tait acouo en vie. Lé Sieu Richard èrmèrcyit tous qui travaillent bein dû pour garder l's affaithes en allant et dit qué ch'tait sa dernié fais à l'faithe, et souhaitait toute chance pour l'avnîn.
Lé Sieur Brian Vibert proposit la santé des officièrs et fit un hardi bouan discours, amusant et séthieux. I' les r'mèrcyit pour chein qu'il' avaient fait pour L'Assembliée. Ch'tait merveilleux dé vaie Lé Juge R. H. La Cornu auvec ieux et ch'tait preuve dé couothage et dêtèrminâtion; ches r'mèrques èrchutent des appliaudissements d'partout. Les Vice-Présidents 'taient deux d'mouaîselles et deux mêssieux bein distîndgies.
En la r'mèrciant, lé Sieur Vibert 'tait amusant envèrs la Ségretaithe et i' r'mèrcyit étout lé Sieur Colin Vibert, s'n assistant, et dit qué l'Trésôryi qui garde les sou et s'n assistante faîthaient eune bouanne tâche. À la fîn du discours du Sieur Vibert les membres lus l'vîtent à béthe à la santé des officièrs.
Lé Juge Le Cornu rêponnit et dit qu'il avait peux d'être co-d'pîsé et d'même s'n allait pas pâler trop longtemps. I' r'mèrcyit lé Sieur Vibert pour ses r'mèrques et si belles patholes et racontit eune p'tite histouaithe pour fini.
Mde. Eileen Le Sueur proposit la santé des Dgèrnésiais et félicitit lé Sieur Harold Martel sus s'n êlection coumme Président. Ou fit la beinv'nue à touos les Dgèrnésiais qu'étaient v'nus et dit qué ch'tait tréjous un pliaîsi d'les vaie. Il' avaient fait hardi d'anmîns et avaient tréjous ieu eune si bouanne réception quand il' allaient en Dgèrnésy. Oulle espéthait qué touos les Dgèrnesiais 'taient à aver un bouan temps et d'mandit au Sieur Marté dé remporter les bouans souhaits à touos les membres dé s'n Assembllaïe. Tous lus l'vîtent à béthe à la santé des Dgèrnesiais.
Lé Sieur Marté rêponnit et èrmèrcyit les membres dé L'Assembliée pour lus beinv'nue et dit qu'il' éthaient eune învitâtion pour lé mais d'septembre et qué l'dînner d'L'Assembllaîe 'tait lé 13 dé novembre. Ch'tait la même chose en Dgèrnésy - la langue sé pèrd et les deux sociêtés avaient lé même problème.
Auprès les discours i' y'eûtent des présentâtions ès danmes Vautier, Richard et Martel et à la Ségrétaithe et au Trésôryi.
Le Président èrmèrcyit les siens en chèrge à l'hôtel pour lé magnifique èrpas et la Dlle. Audrey Le Feuvre pour aver agi coumme maître dé cérémonies pour la séthée. Y'avait eune râffliéthie et la danse auvec la musique à Doug Tanguy et ses parchonnièrs. Ch'fut eune magnifique séthée qui duthit jusqu'à eune heuthe, et tous lus en fûtent siez ieux bein contents.
La préchaine rêunion s'sa eune séthée sociale dans la Salle Pârouaîssiale dé St. Jean, vendrédi, lé 25 d'avri - raffraîchessements, musique et danse. Biillets à vendre pus tard.
1980
Viyiz étout: