Comme il est ecrit, L'yi n'a pon veu ni l'ouothelle entendu, ni l'esprit d' l'homme né peut s'fidguther la beinv'nue qué l'Bouon Dgieu a prépathé: pour les cheins tchi l'aime.
 

J'avons r'nonchi not' sagesse pouor l'Christ, mais ous êtes avisés dans l'Christ; j'soummes faillis, mais ous êtes forts; ous êtes dans la glouaithe, mais nous, j'soummes dans la honte.
 

Mais viyant qu'nou-s'est à scôr'ter, qu'châque houmme graie sa femme, et châque femme sén houmme.
 

Achteu pouor du mangi sacrificié ès idoles. Jé savons qu'touos nous j'avons d'a connaîssance, mais la connaîssance enfl'ye quandi qu'l'amour agrandit. Les cheins tchi craient qu'i' savent tchiquechose né savent pon acouo coumme i' dévthaient saver. Mais autchun tch'aime lé Bouôn Dgieu est connu par lé Bouôn Dgieu.

Épis don, pouor dé mangi chein tch'a 'té sacrifié ès idoles: jé savons qu'eune idole n'est rein du tout au monde, et qu'i' y'a raîque un dgieu. Ch'est en tchi même s'i' y'a des souô-dithants dgieux, sait au ciel sait sus la tèrre (coumme y'a dé vrai un tas dé "dgieux" et un tas d'"seigneurs") tout coumme pouor nous y'a raîque un Dgieu, l'Péthe, dé tchi toutes les choses sont v'nues et pouor tchi qué j'vivons; et y'a raîque un Seigneu, Jésû Chri, par tchi toutes les choses sont v'nues et par tchi qué j'vivons.

Mais ch'n'est pon touos tchi possèdent chutte connaîssance. Tchiqu'uns sont acouo si accouôteunmés ès idoles qué quand i' mangent chein tch'a 'té sacrifié i' l'craient coumme sacrifié à tchique dgieu, et viyant qu'lus conscienche est faibl'ye, oulle est enteuthée. Mais l'mangi n'nos apprèche pon du Bouôn Dgieu; jé n'en sommes pon piéthes si j'n'en mangeons pon, ni mus si j'en mangeons.

Prannez souain tout coumme qué l'exèrcice dé vos drouaits né d'veint pon eune hannicroche ès faibl'yes. Ch'est en tchi si tchitch'un auve eune faibl'ye conscienche vos vait, auve toute vot' connaîssance, à mangi dans l'templ'ye à eune idole, chutte pèrsonne né s'sa-t-alle pon encouothagie d'mangi chein tch'a 'té sacrifié ès idoles? Et d'même chu faibl'ye fréthe ou chutte faibl'ye soeu, pouor tchi l'Onguenné mouothit, est dêtruit par vot' connaîssance. Quand ou l's offensez d'chutte manniéthe et bliesse lus faibl'ye conscienche, ous offensez l'Onguenné. D'même, si chein qué j'mange amène man fréthe ou ma soeu dans l'péché, j'n'en mang'geai d'aut' dé chu mangi, à seule fîn dé n'les faithe pon tchaie.
 

Jé n'sis-t-i' pon libre? Jé n'sis-t-i' pon un apôtre? Jé n'ai-t-i' pon veu Jésû not' Seigneu? N'êt'-ous pon l'rêsultat d'man travas dans l'Seigneu. Même si jé n'sis pon un apôtre pouor tchiqu'uns, j'en sis pouor lé vrai iun pouor vous! Ch'est en tchi ous êtes lé scêlle dé man mêtchi d'apôtre dans l'Seigneu.

Né v'chîn ma d'fense ès chein tchi lus assiègent à seule fîn dé m'jugi. J'n'avons-t-i' pon drouait au mangi et au baithe? J'n'avons-t-i' pon l'drouait d'prendre eune bouonnefemme criyante acanté nous, coumme i' font l's aut' apôtres et les fréthes du Seigneu et l'Rotchi? Ou ch'est-i' raîque mé et Bèrnabé tchi manque lé drouait dé n'pon gângni sa vie auve lé travas?

Tchi qui sèrt coumme un soudard à ses propres dêpens? Tchi qui pliante un gardîn d'vîngnes et n'mange pon d'san vèrjus? Tchi qui souongne un troupé et n'en bait pon d'san lait? J'sis-t-i' à dithe chennechîn raîque s'lon l'autorité d's hoummes? La Louai n'dit-alle pon la même chose. Ch'est en tchi ch'est êcrit dans la Louai d'Moïse: "N'emmus'lez pon un boeu quandi qu'il est à êtamper la graine". Ch'est-i' qu'lé Bouôn Dgieu est gêné pouor les boeux? Coumme dé raison i' dit chenna pouor nous, n'est-che pon? Véthe, chennechîn fut êcrit pouor nous, par cause qué l'chein tchi touônne et bat dévthait pouver l'faithe dans l'espé d'chârer dans l'avoût. Si j'avons s'mé d'la graine dé l'esprit parmi vous, ch'est-i' trop d'mander d'récolter un avoût d'beins d'chu monde? Si d'aut' ont l'drouait d'êt' souôtînts par vous, jé n'dévthêmes-t-i' pon en aver acouo pus?

Mais j'n'avons pon însisté sus ches drouaits. Au contraithe, j'enduthêmes autcheune chose d'vant d'empèchi la bouonne nouvelle d'l'Onguenné.

Né sav'-ous pon qu'les cheins tchi sèrvent dans l'templ'ye sont nouôrris par lé templ'ye, et les cheins tchi sèrvent à l'auté châre dans chein tch'est offèrt sus l'auté? D'même, lé Seigneu a c'mandé qu'les cheins tchu prêche la bouonne nouvelle èrchèvent lus gân d'la bouonne nouvelle.

Ouaithe qué j'sai libre et n'appartcheinge à fis d'âme, jé m'sis fait un escliave à tout l'monde, pouor gângni autant qu'pôssibl'ye. Ès Juis jé d'vîns coumme un Juis, pouor gângni les Juis. Ès cheins souos la louai, jé d'vîns coumme iun souos la louai (ouaithe qué jé n'sai pon mé-même souos la louai), pouor gângni les cheins souos la louai. Ès cheins tchi n'avaient pon la louai, jé d'vîns coumme iun sans la louai (ouaithe qué jé n'sai pon libre d'la louai du Bouôn Dgieu mais sai souos la louai d'l'Onguenné), pouor gângni les cheins tchi n'avaient pon la louai. Ès faibl'yes jé d'vîns faibl'ye, pouor gângni les faibl'yes. Jé sis dév'nu toutes choses à tout l'monde pouor qué j'piêsse par touos les mouoyens pôssibl'yes en saûver tchiqu'uns. J'fai tout chennechîn pouor l'amour dé la bouonne nouvelle, pouor qué j'piêsse chârer dans ses beinfaits.

Né sav'-ous pon qu'dans eune course touos les couotheurs couothent, mais y'a raîque un gângnant? Couothez d'même pouor gângni l'prix. Touos les cheins tchi prennent part dans les gammes font strictément d'l'exèrcice. I' l'font pouor gângni eune couronne tchi n'enduth'tha pon, mais nous jé l'faîthons pouor gângni eune couronne tch'enduth'tha à tout janmais. Dé même jé n'couors pon coumme tchitch'un tchi couort chîn' et là; jé n'bats pon coumme un boxeur tchi bat l'air. Nan-dgia, jé m'bats l'corps et l'fais m'n escliave à seule fîn qu'auprès aver prêchi à d'aut' jé n'sai pon mé-même dêqualifié pouor lé prix.


 

Un châtchun tchi joue dans des gammes pratique bein dû. Ches'-là l'font à seule fîn d'gângni eune couronne tchi n'enduth'tha pon, mais nous, jé l'faîthons à seule fîn d'gângni eune couronne tch'enduth'tha à tout janmais.

 

Séyiz au dget, séyiz fèrmes dans la fouai, séyiz forts coumme des hoummes, et qu'ou faichêtes tout qu'ou faîtes par l'amour.