Et i' y'a gentiment dé difféthents dons, mais i' n'y'a qu' un même esprit.

I' y'a étout des difféthents minnistéthes, mais i' n'y'a qu' un même Seigneur.

I' y'a étout gentiment d'choses faites, mais i' n'y'a qu' un même Bouôn Dgieu, tchi fait toutes choses pour touos nous.

Mais l'esprit tchi s'forme dans châtchun li' est donné pour faithe sèrvi pour tréjous.

Car, comme lé corps n'est qu' iun, ouaithe tch' il ait plusieurs membres, et qué touos les membres dé chu seul corps, ouaithe tch' i' saient plusieurs, né forment qu' un corps, il en est d'même dé Christ.

Car j'avons tous 'té bâptîsis dans un même esprit, pour n'être qu' un seul corps, qué ch'sait Juis, ou Grecs, ou escliaves saient libres; et j'avons tous 'té abrévés d'un même esprit.

Et don, lé corps n'est pon un seul membre, mais ch'en est plusieurs.

Si l'pid disait. pa'ce qué jé n'sis pas la main, jé n'sis pas du corps; né s'sait- i' pouortant pon du corps?

Et si l'ouothelle disait: pa'ce qué jé n'sis pas l'yi, jé n'sis pas du corps; né s'sait-alle pouortant pon du corps?

Si tout l'corps était l'yi, où'est tchi s'sait l'ouïe? S'il était tout l'ouïe, où'est tchi s'sait l'sentîn?

Mais l'Bouôn Dgieu a mîns les membres, et châtchun d'ieux dans l'corps, comme il li'a plieu.

Qué s'i' n'taient tous qu'un seul membre, où'est tchi s'sait l'corps?

I' y'a don plusieurs membres; mais i' n'y'a qu' un seul corps.

Et l'yi né peut pon dithe à la main: j'n'ai pas besoin d'té, ni étout la tête ès pids: j'n'ai pas besoin d'vous.

Mais bein liain dé ch'la, les membres du corps tchi pathaîssent les pus faibl'yes sont les pus nécessaithes.

Et les cheins qué j'estînmons les mains honorabl'yes dans l'corps sont les cheins à tchi qué j'faîsons lé pus d'honneur en les couvrant; dé sorte qué les cheins tchi sont les mains honnêtes sont les pus honorés.

Au lieu qué les cheins tchi sont honnêtes n'en aient pas bésoin; mais l'Bouôn Dgieu a tellement arrangi l'corps tch' il a donné pus d'honneu au chein à tchi tch' il en mantchait.

À seule fîn tch' i' n'y'ait pon dé division dans l'corps, mais qué les membres aient un soin mutuel les uns des autres.

Etout, quand iun des membres souffre, touos l's aut's membres souffrent auve li; et quand iun des membres est honoré, touos l's autres membres en ont d'la jouaie.

Et don, ous êtes lé corps dé Christ, et ous êtes ses membres, châtchun en partitchulyi.