Lé monde aime s'abuser - si ch'est qu'nou bait eune fais dans eune aubèrge, pâsse la maîntchi d'la niet dans un clobe dé niet, ou s'adonne à la seurféthie ou d'aut's sports et gammes.
Ch'est, coumme nou dit, du fanne dans la canne, du ji dans l'pangni, du brit dans l'bathi et du pliaîsi dans l'tchaîsi. Mais dé ioù qu'lé mot scaïte veint? Ch'est un mot bein connu à des vièrs Jèrriais tch'aimaient bein eune bordée dé scaïte d'vant l'arrivée dé toute la télévision, les vidgos, les DVDs et les compiuteurs qué j'avons au jour d'aniet.
Ch'est en tchi ch'est un mot Scots tch'est connu en Êcosse et, à chein tch'i' pathaît, au nord d'l'Angliétèrre. Lé mot est entendu étout en Australie où'est qu'i' veurt dithe un cratcheux.
Mais coumme tchi qu'un mot Scots est dév'nu si fanmilyi à tant d'Jèrriais d'pis bein d's années? Nou peut l'explyitchi par la présence dé régînments Êcossais en Jèrri au dgiêx-neuvième siècl'ye tch'éthaient peu întroduithe lé mot.
Auve lus vilyies, et sonneurs, et séthées, et rêvillon, et rigodon, et cârillon, nou n'éthait pon creu qu'les Jèrriais éthaient ieu à adopter acouo des mots d'même du Scots et d'l'Angliais, mais nou n'peut pon aver trop d'fanne, valet.
Qu'les jannes gens aiment la clob'thie et qu'les mousses aiment la plianche à rouôlettes, ch'est bein seu qu'i' y'a pus d'mouoyens dé s'rêjoui dans chu monde modèrne ouaithe qu'nou n'piêsse pon dithe qu'lé monde est pus heutheux qu'au temps pâssé.
S'ous êtes don à faithe eune bordée dé scaïte, bouonnes gens, ayiz un raide bouôn temps!
Geraint Jennings
Viyiz étout: