|
J'en ai veu de pus d'une sorte Dépis que je t'nais l'tétin, Que je m'craulais sus la porte Et qu'jétais tout à frétin. Voulous saver chein que j'pense De hardi des filles d'ach't-heu? Je lus dirais bein lus chance, Mais i' la sairont en l'heu. Pâlez me d'une bouanne hardelle Qui sait faire sen travas; Qu'est etou avnante et belle, Et propre de haut en bas. Ou ait être bein habillie Sans y mettre touos ses sous; Etre brave et bein paquie Pas dessus et par dessous: Qu'ou sache racmoder des cauches, Qu'ou sache etou les ouvrer; Qu'oulle ait des talons sans hauches Qu'oulle aime mûx couotre qu'broder. Ch'nest pas atou des dentelles, Et toute sorte de ribans Qué les laïes peuvent se faire belles, Ch'est comme la pllie et l'biau temps. Autfais che n'tait qu'crinolines Ach't-heu nou n'vait que chignons; Auv tout chu train là nou dvine Si vla qui pllait es garçons; Si ch'est seulement pour se pllaire Qu'i dont un tel êtalage, Aussi bein je n'ai qu'à m'taire Et lus souhaiter bouan viage. Il y-a des hardies mignonnes, Comme il y-a des saintes-n'y-touche, Qui font mine d'aver peux d's hommes, Et tout l'temps aiment qu'nou lus touche. Ne m'pâlez pon de piercheuses, Picangnresses et tout chonna, Ni d'mille-soutieres orguilleuses Qui s'craient des reines de Sêba. Les grignresses et les pale-faches Sont bouannes a attiser l'feu; Les salopes et les pataches Me font quasi lever l'coeu. De rconte-pet, de bat-d'la goule Il y-en a un divers tas Qui savent par ioù l'pot coule Et lus défauts ne vaient pas. J'ai horreu des ivrouongnresses, Des traitresses, des pinche-boudin; Des mentresses, des fllanteresses Qui n'font qu'conter du gniolin. Il y-a des sures pisse-vinaigre De mine à faire caillir l'lait Qui fraient touanner du cidre aigre Meme le chein de souos la mài. J'ai connu une grand halfrague A rouoge cringne et à tavé Qui n'faisait qu'cherchir une bague Et a fini par l'aver. Ne vla quiq'unes des fautes Qui dans l'sexe n'pllaisent pon Il y-en a bein ocouo d'autres Mais sus l'est j'nos taisons; Si en contant lus affaire I s'en trouve de piquis, Tout chein qui lus rest à faire Ch'est de s'gratter, m'est avis. La véritè n'dait pas s'dire J'ai oui en toute saison; Et i' n'est pas permins d'rire De tout, sans rime ni raison. Les curieux veulent saver ptêtre Qu'est qui tqient d'itès propos Mais si je m'faisais connaitre J'crai que j'n'y gan'gnais pas gros. PL |
Viyiz étout: