Les Pages Jèrriaises

La Caq'téresse

La counnaiss'ous, la caq'téresse ?
Av'ous oui san caquet ?
Si ch'est qu'ou n'est pon picagn'resse,
Ch'est pourtant tout d'itèt
Sans bu ni fin, d'pis l'matin
Oulle a tchic chose à raconter.
Parfais, ch'est vrai... - Pus souvent, j'crai,
Ou' préfèthe yi-même inventer !

La counnaiss'ous, la caq'téresse ?
Av'ous oui san caquet
Nou ouait sa langue aller sans cesse ;
Un moulin à clianquet !
N'y'a pas d'sujet souos tout l'solèt
Sus tchi qu'ou n'piesse, avec grand' jouaie,
Dithe à touos v'nants, petits et grands,
Chein qu'oulle en pense et chein qu'en est!

La counnaiss'ous, la caq'téresse ?
Av'ous oui san caquet
En'n'taiche eune horriblye pècheresse,
Oul lis copi l'filèt!
Touos ses vêsins, pathents, anmins,
Dés qu'i'la vaient n'se montrent pon :
Ils ont tous peux, les malheutheux,
D'sa fichue varvette à banon!

La counnaiss'ous, la caq'téresse ?
Av'ous oui san caquet
Sen houmme, à but d'pâtiench' la laisse :
Sa langue est coumme un fouet!
Pour aver paix, i' n'tête jamais ;
Ch'est tréjous l'yi qu'êthait l'au-d'sus.
Et bain souvent, sus un héthan!
L'pouor' corps pour dîner fait d'san mus.

 

Elie

 

Viyiz étout:

 

Les Pages Jèrriaises