Fallbrook,
California, USA.
Lé 4 dé mar, 1978.
Moussieu l'Rédacteu,
Quand j'vouos env'yis eune lettre d'ichîn, en Califournie, la s'maine pâssée, jé v'nais d'arriver à San Diego et Fallbrook dans un temps supèrbe, mais v'la tchi n'a pon duthé longtemps. Ch'n'est pon tch'i' fait fraid. Au contraithe, lé temps est doux, mais ch'est la plyie! J'sis siez d's anmîns (Mdme. Sidney Triggs, née Carré) tchi d'meuthent parmi les montangnes à chîn milles dé la ville. Quand i' plieut dans les montangnes i' faut s'attendre qué l'ieau s'en va ruisseler ava, et ch'est ch'là tch'enfl'ye les cannieaux et riviéthes et les font dêborder les banques et innonder rues et pâssages auve eune profondeu dg'ieau tch' empêche gens et vouaituthes dé pâsser. Dans des cas d'même, les gens sont isolés sus les hauteurs où'est tch'i' d'meuthent.
Comme j'l'ai souvent mentionné, j'sis d'avis qué l'clvinmat du monde est en changeant. J'en vai la preuve touos l's ans. Lé temps n'a pon 'té si bé en Floride, au Texas et ichîn comme il 'tait l's aut' années. Ch't hivé a 'té hardi sévéthe dans l's êtats du nord et au Cannada. Mes fréthes tchi d'meuthent là m'êcrivent à m'dithe tch'i' sont englioutis par la né, et qu' même les tchéthues à né ont fort à faithe à clièrgi les rues pour pèrmett' la circhulâtion d'gens et d'motos.
Ichîn, dans l'sud dé la Califournie, ch'est la plyie tchi les vengent. Dans la montangne où'est qué j'sis, j'peux comprendre la crainte tchi d'vait êffriter les gens ès, alentours du Mont Ararat dans l'temps d'la Bibl'ye quand lé D'luge c'menchit à faithe l'ieau monter à l'entou d'ieux et tchi'i' n'viyaient autchun mouoyen d'êviter l'naufrage. En Jèrri, j'disons “Auprès nous, l'Déluge!” Mais pour ieux ch'tait l'Déluge et l'ensevelissement par l'ieau.
Heutheusement, où'est qué j'sommes j'pouvons dithe qu' auprès lé d'luge dé plyie d'hièr, d'aniet et d'main, j'espéthons r'vaie l'arc-en-ciel tchi nouos ditha qu' la promêsse tch'i' n'y'étha pus d'itelle avârie est acouo bouanne au jour d'aniet, et qué l'solé s'en va r'lithe comme dé pus bé iun d'ches jours. Mais pour vouos donner eune idée d's achies d'plyie tchi nouos isolent sus la montangne, j'en eûnmes trais pouces mêcrédi, et quat' pouces dépis. Acouo heutheusement, nou peut l'dithe, j'avons tout pliein à baithe et mangi. Et ch'n'est pon eune sévéthe peunnition dé n'pouver pon travèrser les deux ponts tchi mènent en ville et tchi sont souos l'ieau. J'n'avons pon d'êlectricité pour lé moment. Un gros bouais, sa raichinne dêgradée par un couothant dg'ieau, s'est êcrouôlé et a tchaie sus un fi d'fé êlectrique et nouos en a ôté l'ûsage. Pour la preunmié fais pour bein longtemps, j'mé sis râsé atout man vièr râseux cope-gorge. Jé l'porte tréjous auve mé en viage pour en cas d'bésoin. Chutte fais il est dév'nu c'mode.
Eh bein, nou dit qu'à tchiquechose malheur est bouan. Dans man cas, dépis qué jé n'peux pon sorti à cause du mauvais temps, j'sis à m'abûser à brâsilyi l'îndex du quatrième voleunme des Bulletîns d'Quarts d'An dé L'Assembliée d'Jèrriais. Quand j'en éthai finni ché s'sa un îndex cosmopolitain, car il étha 'té fait à bein des bords êlouangnis l's uns d's autres. J'ai travailli d'ssus à San Antonio et à Terlingua, à côté d'la riviéthe Rio Grande dans lé “Big Bend National Park” à 450 milles dé San Antonio au Texas, et m'èrvélà en trains d'en finni à pus d'mille milles pus liain en Califournie. Et j'ai ieu à porter les bulletîns et la papet'tie nécessaithe auve mé par avion partout, ch'est en tchi jé s'sai bein content quand ché s'sa finni et prêt à env'yer en Jèrri.
En pâlant d'Jèrri, tch'est tch'i' s'y pâsse, ches jours? J'pense bein qu' ou-s-avez mauvais temps là-bas étout. J'mé d'mande si les pouôrres dgiâtres d'fèrmièrs ont peu touânner lus tèrres et plianter lus patates. La plyie ichîn m'ramémouaithe qué j'ai tréjous ouï tch'i' n'peut janmais en tchaie trop en Jèrri d'vant Noué, mais qu' ch'est aut' affaithe quand ou continnue. Ch'est don mînséthe pour ieux quand ou continnue longtemps auprès et tch'i' faut du bieau temps pour prépather la tèrre.
Enfin, lé temps s'pâsse en grand' vitesse. Nouos v'la dêjà l'mais d'mar, et dans un coupl'ye d'mais jé s'sai à penser d'aborder un avion pour aller vouos vaie en Jèrri et otchuper lé Vièr Ménage ès Feuvres pour l'êté. Tch'est tch'i' sait? Jé s'sai p't-êt en Jèrri dévant qu' la préchaine gâzette arrive ichîn! La dreine èrchue 'tait du seize dé dézembre!
George d'La Forge
(Chutte lettre sé trouvit par mêsgarde à Manila dans les Philippinnes!)
Viyiz étout: