La Batâle pouor la Libéthâtion
Auvec lé frédas des canons et des bombes au liain, man jour d'la Libéthâtion 'tait cliai et ensolilyi. Ch'tait la Saint George, lé vîngt-trais d'Avri, et d'pis deux-trais s'maines j'avions ouï lé combat d'la dgèrre tch'appraichait not' camp Biberach 55VD, situé au nord d'la ville dé Biberach dans la Baviéthe.
Dînmanche, jé seurvilyions l'armée Allemande en r'traite vèrs l'Sud près d'not' camp et duthant l'arlévée, des tanks Français tchi cachaient l'travèrs d'la ville et continnuaient l'long du c'mîn d'fé à Ulm.
Duthant la niet des 22 et 23 eune bombe êcliatit auprès d'not' camp et l'Quartchi Généra d's Alliés nos c'mandit d'rester dans l'camp en attendant d'aut's ordres.
Lundi, l'vîngt-trais, not' chef d'camp fut pèrmîns d'env'yer un houmme sus eune bike pouor commeunitchi ès Français Libres souos l'Généra Le Clercq l'endrait exact dé not' camp.
L'Officyi Allemand tchi 'tait en chèrge dé not' camp nouos dit qu'les Français arriv'thaient par trais heuthes dé l'arlévée, mais l's Allemands en s'èrtithant lus 'taient stâtionné à l'entou d'nous et c'menchîtent à tither sus les Français coumme il' avanchaient.
Nos gardes Allemands lus prêssîtent et haûlîndgîtent des couleurs et des bliancs lîncheurs sus les cliôthuthes dé fi barbé.
Pis y'avait eune tèrribl'ye explôsion tchi châtchit l'camp et eune hutte driéthe lé storre d'la Rouoge Crouaix fut dêtruite. Les soudards Allemands s'taient muchis d'dans auve un ênorme canon et tithaient sus nos libéthateurs. La batâle èrquémenchit dans les clios labouothés à l'entou d'not' camp et j'pouvions vaie les troupes Allemandes tch'êprouvaient d'lus êcapper par touos les bords.
Des boulets sûffliaient par d'ssus d'not' camp mais pèrsonne n'étaient bliessé et ch'fut tout finni d'vièrs siex heuthes. Un soudard Français vînt à la hèche prîncipale du camp mais i' n'dêcliathit pon qu'achteu j'tions libéthés.
J'restions driéthe lé fi barbé jusqu'à la fîn d'la dgèrre pa'ce qué ch'tait pus sauf. Mais j'tions bein heutheurs, car bétôt jé séthions siez nous en Jèrri!
Hazel Lakeman
Viyiz étout: