All'-ous quédaine? Assa, i' n'faut pon aller d'eune trop grande ièrre car un conmité présidé par lé Connêtabl'ye dé Saint Jean est à considéther les lînmites dg'ièrre. Nou-s'a grée un tchestchionnaithe pouor lé publyi à seule fîn d'saver l'avis du monde entouor la quédain'nie. Ch'est-i' qu'nou dait baîssi les lînmites dans les villages et en Ville? Et tchi faithe pouor les Vèrtes Ruettes?
Nou sait bein qué dans des rues où'est qu'i' y'a des pliaintes entouor les cheins tchi brûlent la route, ch'est bein souvent les résidents ieux-mêmes tch'y sont les quédaineurs. Quand nou connaît bein lé c'mîn et nou veurt arriver siez sé dêliêment ch'est trop aîsi d'aller d'eune divèrse ièrre au dêpiet des vaîthîns. Ofûche qu'i' vaudrait înstaller iun d'ches êcritchieaux à souôri ou à grîngne dans ches rues.
Lé tchestchionnaithe démande étout si ch'est qu'nou-s'est en faveu d'ches êcritchieaux-là tchi présentent eune fache heutheuse ou tchi lus capent s'lon la vitesse du cacheux tchi pâsse. V'là tch'est psychologique, dgia! Eune sornette êlectronnique tch'approuve ou d'sapprouve a un pus fort êffet qu'un êcritchieau tchi donne raîque la lînmite - au mains pouor eune pause. Mais nou s'accouôteunme à tout, ouaithe qu'nou s'pliaingne qu'les lînmites sont tréjous à changi chîn' et là avaû les c'mîns.
Achteu j'avons des lînmites dans l'vaîthinné d'êcoles tch'ont êffet raîque eune partie d'la journée. Ch'est pus sophistitchi, mais chenna n'sîmplyifie pon l'système des lînmites.
Y'en a tchi voudraient aboli les lînmites et lus fier à l'idée qu'les cacheurs peuvent décider ieux-mêmes les bouonnes vitesses sus les c'mîns s'lon l'temps tchi fait, lé trafi et la laîze d'la route. Épis y'a les résidents tchi n'veulent pon aver les boulants à aller l'dgiâbl'ye avaû lus c'mîns. I' n'peuvent pon lus accorder coumme des p'tits couochons, ches'-là, mais au mains i' peuvent exprînmer lus avis atout l'tchestchionnaithe.
J'éthons-t-i' des nouvelles lînmites dg'ièrre ou la dgèrre des lînmites?
Geraint Jennings
Viyiz étout: