Trenton, Michigan,
U.S.A.
Lé 22 d'novembre, 1969.
Moussieu l'Rédacteu,
J'rvîns du Cannada lundi passé. J'cachis les 525 milles en moto dans neuv heuthes! Il avait tchaie d'la né lé sanm'di dé d'vant, et nou-s-en viyait partout dans les clios et sus les bouais l'long d'la route, mais la route-mème 'tait nette et nou pouvait cachi à septante milles à l'heuthe, vitesse pêrmînse dans la grand' route MacDonald-Cartier Freeway tchi va tout l'long du c'mîn, eune distance dé 560 milles, dé Windsor, l'extrème cârre seur-vouêt d'la province d'Ontario, jusqu'à joindre (allant est) la frontchièthe dé la provînce de Tchubec, pas bein liain d'Montréal. Lé freeway longe lé fanmeux Fleuve St. Laurent dé Kingston, Ontario, à Valleyfield, Tchubec - eune distance dé 180 milles. À Kingston lé fleuve dêbouche dans l'Lac Ontario.
Quand nou va eune longue distance à septante milles à l'heuthe en moto i' faut aver l'yi bouan et l'garder sus la route l'avant à sé. Heutheusement, nou n'vait pon fort dé piêtons - ni en braies ni en mini-jupes - et i' n'y a pon d'raison pour èrgarder d'travèrs comme eune poule tchi s'en va pondre, ou en haut comme eune pithotte tchi sent d'l'orâge. Sans doute, lé long d'la route nou vait des sîngnes (nou dithait des poteaux indicateurs en Français) tchi montrent lé maximum et l'minnimum dé vitesses autorisées (lé minnumum est d'habitude 45 milles à l'heuthe), et où'est tch'i' faut molli d'vitesse en appréchant des carrefours ou d's entrées ès stations d'sèrvice dé pétrole et des restaurants qué nou trouve à bein près toutes les trente ou quarante milles. I' faut don garder routes et sîngnes en plieine veue si nou veurt faithe lé viage en vitesse et en seûtheté.
J'faîsais l'mème trajet - ch'est à dithe dé Detroit, dans l'Michigan, à Ottawa, Ontario - y'a quarante-chînq ans, mais tchi difféthence dans chu temps-là! J'y pensais lundi en rouôlant à septante milles à l'heuthe sus la surface d'eune route chînmentée ou tathée, et large assez pour trais ou quat' motos côte a côte et divisée atout eune lisièthe d'hèrbe dans l'mitan pour qué la cirtchulation d'l'aut' bord dé la route sait en sens contraithe pour empêchi qu'nou-s'aie à rencontrer les motos en direction opposée.
J'm'èrsouveins qué dans chu temps-là ch'tait eune aventuthe d'entréprandre à cachi un moto si liain. À c'menchi, les motos d'l'êpoque n'étaient pon les cheins d'à ch't heu, et il en fallait un bouan pour aller chînquante milles à l'heuthe. Les pneus n'duthaient pon longtemps, sustout sus les routes dé y'a chînquante ans. Il' 'taient êtraites, ayant 'té faites pour lé j'va et l'hèrnais, et la surface dé pièrres cassée et tassée au roûleux 'tait pûtôt rude qu'autrément. Quand i' c'menchîdrent à l's êlaisi ch'tait acouo piéthe, car i' fallait tchiquesfais aller des milles sus la pièrre cassée tchi n'avait pon 'couo veu l'roûleux. Et pis les dêtours! I' fallait souvent aller des milles hors la vaie dévant pouver r'joindre la route directe!
Dans chu temps-là j'tais l'seul dé la fanmile tchi d'meuthait en Améthique, et i' m'prannait deux jours aller vaie m'mèe et mes fréthes et soeurs à Ottawa. J'allais jusqu'à Toronto l'preunmié jour et j'passais la niet siez l'Sieur Ouoyamme Coutanche (dé Sion aut'fais) tchi n'est pus. Pus tard, quand mes fréthes John et Percy vîndrent en Améthique, j'allions deux d'nous à Ottawa, et nou faîsait l'trajet sans arrêt à Toronto car nou pouvait cachi tou a tou et iun pouvait dormi sus l'banc d'drièthe quandi qu'l'aut' cachait. J'sortais d'l'office à chîntch heuthes lé sé, et fallait crouaîsi la riviéthe dé Detroit à Windsor par stînme et mett' le moto à bord. I' fallait passer l'travèrs dé toutes les villes. Hamilton, Ontario, est à 190 milles dé Windsor, et j'ai veu passer toute la niet pour y'arriver à sinne dé jeu, et arrêter dans la ville et dithe à Percy, couochi en drièthe Rêvillé-té, man garçon, j'sommes à Hamilton et ch'est tan tou à cachi! Auve la chance et l'bieau temps, nou-s-arrivait à Ottawa tard lé sé, ayant fait les 300 milles dans 28 à 30 heuthes. Mais s'i' fallait changi un pneu (eune fais man fréthe Fraînque en changit treize sus la mème route) ch'tait eune aut' affaithe! I' fallait en porter plusieurs d'êpaîngne!
Pus tard acouo, à m'suthe qué les routes amendaient et qu'les motos et pneus 'taient pus seûthetabl'yes, en sortant d'l'office à chîntch heuthes nou pouvait arriver à Toronto (240 milles) dé vièr chîntch heuthes du matîn, et arriver à Ottawa en temps pour baithe du thée l'mème jour, ayant fait l'trajet dans 24 heuthes.
Il a passé un tas dg'ieau par La Corbièthe dépis chu temps-là. À ch't heu nou peut travèrser la rivièthe dé Detroit par lé pont en d'ssus ou la tonnelle en d'ssous, et ch'n'est rein d'faithe lé mème trajet dans neuf ou dgiex heuthes. Nou s'pliaint dans des temps qué l'progrès gâte tout, mais il a cèrtainement amendé l'comfort et avanchi la vitesse du viageux!
George d'La Forge.
Viyiz étout: