Les Pages Jèrriaises

Papa, est-i' leuné?

 

L'Houmme dans la Leune

Ouèche! Et né v'là acouo eune fîsée tchi s'lanchit ès cieux dé d'dans l'gardîn à Papa chu chîn d'Novembre - la Séthée d'Guy Fawkes.

Papa avait acaté eune belle collection d'feurs d'artifice et toute la fanmil'ye avait bâti eune grande fouée dans l'gardîn auve des chouques et des buts d'vielles câsses. Papa s'rêjouissait dans sa djobbe dé maît' dé cérémonies en alleunmant les reues à Cat'linne et les montangnes dé feu et sustout les fîsées, quandi qué M'mèe et la Tante Michelle griyaient l'soupé dans la tchuîsinne.

“Ah, tchi fanne!” dit Papa, “V'là tchi m'fait penser à la mission spatiale dé Jèrri quand j'tais pus janne...”

“Oh, P'pèe,” gronnit l'Oncl'ye Dâvi, assis sus les d'grés du patio à baithe eune modgie d'vîn brûlé, “s'i' t'pliaît, ch'n'est pon acouo ieune d'tes histouaithes qué tu t'en vas raconter au mousse? Fai attention ès fireworks!”

“Ah bein, mais ch'est d'l'histouaithe!” protestit Papa. “Il est împortant qué lé p'tchiot sache lé rôle qu'la vaque dé Jèrri a joué dans l'explorâtion d'l'Unnivèrs.”

“La vaque?” qué j'excliâmis. “Tchi vaque?”

Et Papa c'menchit s'n histouaithe, sa fache èrlithant rouoge dans la lueu d'la fouée.

“Èrgarde les êtailes!” i' m'dit en l'vant un dé vèrs l'ciel. “Les Russes fûtent les preunmièrs à lanchi eune satellite tchi fit l'tou d'la Tèrre - ch'fut lé Spudnique.”

“Mais, nou-fait...” întèrrompit l'Oncl'ye Dâvi.

“Tais-té,” dit Papa. “Tu'es un nâdgeux. Ch'est mé tchi raconte l'histouaithe.”

“Té, tu'es un fichu vièr menteux,” atchûsit l'Oncl'ye Dâvi, “et j'm'en vais r'trouver l's aut's dans la tchuîsinne - les saûciches es'sont bétôt prêtes.” Et i' s'en fut.

“Ch'est aîsi d'crititchi,” dit Papa. “Mais sai-tu pouortchi qu'chutte preunmié satellite 'tait app'lée l'Spudnique?”

“Nânnîn, Papa.”

“L'idée 'tait, bein seu, d'env'yer d's hoummes à la Leune et ès plianètes, mais pouor c'menchi i' 'tait nécessaithe dé faithe des expéthiments. Coumme dé raîson, i' faut env'yer tchiquechose p'tit et vivant dans l'espace avant d'lanchi un houmme. Et les Russes quémenchîtent auve des patates.”

“Des patates, Papa?”

“Oui-dgia, man p'tit. Auprès les patates sus l'Spudnique, i' lanchîtent un p'tit tchian - chu Laïka. Et l's Améthitchains mîntent des marmoûsieaux dans lus navithes spatiales. Mais l'gouvèrnément Britannique voulait bâti eune fîsée étout pouor battre les Russes et l's Améthitchains.”

“Y'avait-i' eune fîsée Britannique étout?” jé d'mandis à Papa. “Quand tchi qué ch'tait?”

“Oh, duthant l's années souaixante, quand y'avait les Beatles et les Rolling Stones et Londres 'tait à souîndgi. Mais i' n'savaient pon ioù lanchi lus fîsées, car tu vai qu'i' n'faut pon lanchi les navithes spatiales trop liain d'la Lîngne - l's Améthitchains lanchent les leu en Floride, bein dans l'Sud d's Êtats Unnis.”

“Mais la Russie s'trouve au Nord, auve d'la né et d'la gliaiche,” j'objectis.

“Ch'est en tchi lé vodka renforche l's êffets d'la gravité,” dit Papa. “Mais l'gouvèrnément Britannique, n'ayant pon d'vodka en quantités grandes assez, chèrchait pouor un endrait au Sud dé tchi lanchi lus fîsées, et où'est qu'est la taque la pus au Sud dans l's Îles Britanniques?”

“Les Mîntchièrs!”

“Véthe,” dit Papa. “Et l'gouvèrnément Britannique décidit d'amender l's expéthiments des Russes et d's Améthitchains et auprès les patates, et les tchians, et les marmoûsieaux, i' voulaient lanchi eune vaque Jèrriaise dans l'espace.”

“Et ont-i' vraînment lanchi la vaque des Mîntchièrs, Papa?”

“N'as-tu janmais ouï d'la vaque tchi sautit par d'ssus la Leune?” Et il alleunmit lé bliu papi et s'cârrit.

L'Oncl'ye Dâvi a raîson: Papa est un fichu vièr menteux.

 

Geraint Jennings
2003

 

Viyiz étout:

 

Les Pages Jèrriaises