Tchiquefais, quand j'sis à m'prom'ner dans les ruettes tout près d'la p'tite églyise dé St. Pièrre La Rocque, jé m'rappelle des histouaithes qué l's anciens d'ma fanmil'ye soulaient m'conter quand j'tais mousse. L's uns app'laient chu canton-là La Rogodaine et d'autres disaient La Rocque Godesme - et tous pâlaient du gros pèrron ainsi nommé tchi s'trouvit dans un clios tout près d'l'églyise.
Quand St. Pièrre la Rocque fut bâti en mil huit chent chînquante-tch'ieune, la pièrre du pèrron fut carriée pouor sa construction et souos-disant tch' il y eut des difféthents entre l'augni du clios et l'Minnistre entouor lé tchithiage d'la pièrre.
Comment, don, dans chutte région dé l'île si pliatte, qui psse y aver un 'té gros pèrron? Eh bein, sinon l's anciens, i' y a deux légendes tch'explyiquent l'affaithe.... La preunmiéthe nos dit qué i' y a bein d's années, quand les p'tits faîtchieaux d'meuthaient par là, iun d'ieux décidit d'aller, à mi-matheé, qu'si un gros pèrron dé sus la grève à la Rocque - pourtchi jé n'sais pas! - et auprès en aver chouaîsi iun des pus gros, i' l'emportit au vol, dans san d'vanté. Maltheutheusement, en volant par déssus un clios, les amathes dé san d'vanté dêfîtent et l'pèrron tchit dans la carre du betchet et i' restit là jusqu'à qu'i' fûsse carrié pouor bâti l'églyise.
La deuxième histouaithe concèrne deux giants tch'eutent séthieux grabage et qui s'entre-guettaient sans cêsse, châtch'un ayant l'idée d'achouêmi l'autre au pus tôt. Un jour, iun d'ieux, s'trouvant sus l'haut dé Vèrcliut à Grouville, apèrchut l'autre engambant l'travèrs dé la Rocque, i' gaffit un gros pèrron tch'était d'à main et l'fliantchi sus li. La grosse pièrre tchit dans la carre d'un clios et devint connue souos l'nom d'la Rogodaine ou la Rocque Godesme. Pèrsonne n'savent si l'giant fut tué ou non!
Ch'est întérêssant qué, dans un dotchument dé l'année douze chent dgiêx-huit, nou fait mention dé La Rocque Godeine.
Ch'est difficile, dé nos jours, dé pouver imaginer un gros pèrron d'eune trentainte dé pids d'hauteur par là!
Joan Tapley
Viyiz étout: