Man vièr Fraînque,
J'pense touas les jours à Jerri, mais, drôle de chose, i' s'adounne qué hier, quand j'tais en train dé dénichi tchiques papièrs, jé m'mins à penser à L'Assembliée d'Jèrriais et j'mé d'mandis s'i' y'avait acouo assez d'gens en Jerri intérêssis dans l'Jèrriais pour la souât'ner. Eh bein, la rêpounse est vnue à matin, dans ta lettre et la sienne à la Dlle. Amy. J'veins d'li'escrithe à lyi dithe qué si l'Bouan Dgieu mé préserve jé s'rai bein countent d'être avec vous lé 23 novembre et d'proposer la Santé d'L'Assembliée. Nou-s-en r'pasl'ra devant la bordée, mais ou pouvez vos fier sus mé.
Nos v'là aller sus l'âge, man vi, mais j'vé par ta lettre qué tu gabarres hardi bein, et, Dgieu merci, mé étout. J'ai acouo des affaithes qui m'appellent à Loundres deux strès fais la s'maine, et hors pays dé temps en temps, mais aussitôt qu' j'ai eunne chance mé v'là d'hors dans mon gardin. Jn'ai pas acouo pianté - la terre est tardive par-ichin - mais ma s'menche est bein germée. J'pense bein qué par siez té eune bouanne journée d'plyie né f'rait pas d'ma, mais par ichin la terre mouaille qué l'dgiâtre. J'n'ai pas ieu trop d'embarras ch't hivé car il a fait bouan sé, mais l'année passée quand j'eûmes tant d'plyie, n'y'avait autchun moyen d' s'y mettre et j'taîmes au mais d'mai quand j'arrivis à pianter mes fèves! À la préchaine, man vi, et mes coumpyîments siez té.
Tan vièr anmîn,
Arthur de la Mare.
Lé 12 mar, 1976.
Viyiz étout: