|
Dépis qué j'l'ûmes, y'ia quatorze ans, Au partage dé nos bouannes vieilles gens, Oulle a gardêh tréjous bouan temps Ma vieille Hanlouoge. Chent ans, ou pus; y faut qu'oulle ait Au p'tit fins meins, m'dit m'n'hanlouogié, Mais l'exacte àge pèrrsonne né sait D'ma vieille Hanlouoge. La câsse est faïte dé drôle dé boiës, Et d'haut en bas, couvèrrte oulle est D'images èt d'înmânues d'Chinoiës Ma vieille Hanlouoge. Les deux b'zêhs peithent un quart dé chent, Et l'balanchié, ch'n'est pon souvent Qu'n'ou z'en vait comme lé chein qui pend Dans mein Hanlouoge. Sinon quand oulle arrête t'chique fëis, Ou m'montre tréjous lé jour du mëis, Et miyieu Quart j'n'ait veu janmais Qu'ma vieille Hanlouoge. Lé temps d'la Lune, dans un qu'yin d'ghé, Nouvelle ou p'yienne, ou au quartché, J'peux tréjous vëis ètout par yié Ma vieille Hanlouoge. Quand j'l'eu nëttie y'ia dëus trëis ans, Un gros pêtre y trouvîdrent dédans, Il avait têh tuêh en s'prom'nant Dans mein Hanlouoge. Vaithe, Mousieu Pêtre en sé prom'nant, La bastringue qui bast'chule en d'dans L'avait êcrâsêh en sonnant Dans mein Hanlouoge. Dévans m'couochi, l'Sam'di au sé La dèrrhnié chose, j'la monte tu sait, Ch'est rare ma fingre qu'j'manque dé pensé A mein Hanlouoge. Et quand j'la monte ou va "click, click," Et d's'maine en s'maine ou va "tick! - tick!!" Et pis t'chique fëis ou m'joue des triques Ma vieille Hanlouoge. Une n'yiêh - ch'taît l'mëis d'Janvié passêh, Bein caud au yiêh j'tais catinêh Nancy m'criyi l'air êfritêh Ecoute l'Hanlouoge? Et des cos d'coute s'mins à m'donné, Lêve-té! - N'reste pas là à gronné, Car septante-chins!! - ou veint d'sonné La vieille Hanlouoge. Tu'âs la Ponceraisse, j'l'y dis. Dors-té. Mais tout d'même j'm'mins à êcouté, J'ouï qu'a sonné ou continué Ma vieille Hanlouoge. En cauches dé neuches èt bonnêh d'n'yiêh (J'faisais sans doute un biyeau portrêh) J'alli donc vëis, à meintché g'lêh A chutte Hanlouoge. Et mëttant bas la b'zêh qu'j'y'iôti, Lé gros orrtêh j'mé calfëiti, Mais la sonnie vîte j'arrêti D'ma vieille Hanlouoge. Ch'têh un pégon qu'avait donnêh Des chents cos oulle éthait sonnêh Dévans qu'oulle éthait arrêtêh Ma vieille Hanlouoge. Comme j'nous amusons, mé èt men "Jim," A r'grès d's'hanlouoges - èt feithe des rimes; Dans démieuthe j'la r'av'yions en "trim" Ma vieille Hanlouoge. T'chique temps après quand j'r'vins d'travas, J'trouvi Nancy lès esprits bas, Oulle avait ouï - "un têh frédas" Tout près l'Hanlouoge. Vaithe sus ses nèrrhs, toute boulverrsêh; J'la trouvi là une arrlévêh; Pitchie à r'gardé, d'dans l'allêh, Not'e vieille Hanlouoge. T'chique cho-o-ose, ou'm'dis, va a-a-arrivé, Un a-a-avèrrti, j'ai ouï crait mé, Et v'la t'cha cr-r-ratchi comme si ch'tait Au bas d'l'Hanlouoge. Bah! bah!! j'lis dis, faut allé vais: Et j'ai m'mîns à monté les d'grès Et pis à rithe quand j'vins tout près Ma vieille Hanlouoge. Car, j'vi qu'oulle avait arrêtêh, Qu'y'une des b'zêhs avait tchelbutêh, Qu'ch'tait yié qu'chu frédas avait fâith Ma vieille Hanlouoge. J'ai'n'pensais pon d'en dithe autant Mais d'griff'yionné, ma pipe fumant, Deus trëis vèrrsés, en m'passant l'temps, Sus mein Hanlouoge. Mais j'crait qu'nen v'là assêzh chutte fëis, Qu'ëique un p'tit livre, écrithe j'pouorrais, Si s'adonnait qué l'temps j'éthais Entouorr m'n'Hanlouoge Et comme j'êcri j'en entends l'son, Tchi compagnie dans une maison, Pour deus trëis neuves jé'n'donnais pon Ma vieille Hanlouoge. Ah mais nen d'ja, car j'y tcheins tant, Qué men pain sêh, jé mangeais d'vans Ou d'men yiêh j'ai'm'dêbât'tais d'vans D'vendre mein Hanlouoge. Pus tard: si l's èsfants d'nos èsfants, Prennent soïn, comme ont faïth lus vieilles gens, Oulle îtha pour un aut'e chent ans Et s'a app'lêh par p'tits et grands Gran' Pa's old Clock Ma Vieille Hanlouoge. C'h'la S'peut Londres, 1886 |
Viyiz étout: