Les Pages Jèrriaises

Les Heures

l.

HEUR'S qui - sortant du grand mystèr' - v'nez ichin bas no's vais,
Pourqui vo's glissous donc si vite à travers de nos daits?
Ech' qu'ou n'pouvez pas no's souffri? je l'crains - car 'ou filez
Et vo's v'là ort's, plien' velle, à pein' qu'ov nous 'ou vo's trouvez.

2.

Si chtait a tout! mais che n'lest pas!... 'ou d'vez no's en vouler;
Car - pourqui, autrement, O heur's! vo's pliaire à no's happer
Jeuness' d'abord, p'is innocence, et p'is bétôt aprés
Forche - biauté - et, p'us aquor', - la raison mêm' quiqu'fais?

3.

Et pas content's de gaffer tant, O cru'ell's heur's! pourqui,
Gourmand's et traitress' n'av'ous, donc, sus nous auchun' pitchi?
Mais, si souvent, chergis vos ail's (coumm' si chfut un dévé),
De c'qui n'vo's sert, mais no's est tout? L'amour et l'amitié.

4.

Heur's, heur's! un miot de grace! aut' chos' - tout' aut' - enl'vez ov' vous -
Mais l'amitié, not' grand trésor, et l'amour, laissis nous!
Sian-cas, - dit's mé - O iou all'ous? que là mon queur vo's suive
Car, sans lius deux, dans chu fraid mond', pas moyen qu'il y vive.

 

L.

 

Vèrsion modèrnîsée:

Les Heuthes

Heuthes tchi - sortant du grand mystéthe - v'nez ichîn bas nos vaie,
pouortchi vos gliss'-ous don si vite à travers dé nos dés?
Est-che qu'ou n'pouvez pas nos souffri? jé l'crains - car ou filez
et vos v'là hortes, plieine vaile, à peine qu'auve nous ou vos trouvez.

Si ch'tait là tout! mais ché n'l'est pas!... ou d'vez nos en vouler;
car - pouortchi, autrément, O heuthes! vos pliaithe à nos happer
jannèche d'abord, pis înnouothance, et pis bétôt auprès
forche - bieauté - et, pus acouo, - la raison même tchiquefais?

Et pas contentes dé gaffer tant, O cruelles heuthes! pouortchi,
gourmandes et traitresses n'av'-ous, don, sus nous autchun pitchi?
Mais, si souvent, chèrgiz vos ailes (coumme si ch'fut un dévé),
dé ch'qu'i n'vos sèrt, mais nos est tout? L'amour et l'amiêtchié.

Heuthes, heuthes! un mio de grâce! aut' chose - tout' aut' - enl'vez auve vous -
mais l'amiêtchié, not' grand trésor, et l'amour, laîssiz-nous!
Si'en-cas, - dites-mé - O iou all'-ous? qué là man tchoeu vos suive
car, sans lius deux, dans chu fraid monde, pas mouoyen qu'il y vive.

 

Viyiz étout:

 

Les Pages Jèrriaises