Les Pages Jèrriaises

La p'tite Hoaulouoge qui câriyionnet.


Je connaissais eunne dame qu'avet d'la peine à se l'vé
Où restait au yiet bein tard au matein,
Eun jour yieun d'ses ammeins l'y donnit eunne haoulouoge
Chest qu'où'l en erait hardi ou'l en fait d'grands êloges.

Il est vrai qu'oul est qu'mode où peut câriyionné
Et n'vos laisset pan dormi tard le matein
Où câriyionne si haout où n'a que d'êfondsé
Chest comme s'où vos dîset, il est graud temps d'vos l'vé.

Chute dame là n'aimait pas à se couochit d'bouanne heuthe
Où pâsait ses séthaies à yièthe et hôtait pour des heuthes
Et pis où penset à s'couochit d'viers maingniet
Quand touos les aoutres dormait trantchillement au yiet.

Ne v'la eunne bouanne séthéai qu'où s'aîmancipit
De monté chute haoulouoge avant de s'couochit
Il tet maingniet pâsets tout était bein trantchille
Y dormais tous, y s'adonnet que tchet eune gniet paîsibyïe.

Et bein où qu'menchit à la monté du bord du câriyion
L'adguielle était sus l'chiffre qu'où n'avait pas fait attention
Ne v'la chute p'tite haoulouoge qu'menche à câriyionné
La pouore femme ne savait pas tchi faithe ni tchi pensé.

Ou'l avet peuex d'aisfritté et d'rêvillyi tout l'vaissiné
Où la coule dans l'armoièthe amont la chimneai sçouos san d'vanté
La p'tite hoaulouoge bein monteai continue tréjous à câriyionné
La chièthe femme amuseai riait tant où n'avait que d'en étouffé.

Chute dame là ne criyiait pas que jamais l'hoaulouoge finithait
Quand où tâchet d'êstouffé l'son, pus l'hoaulouoge câriyionnet,
Oh! mais qu'où câriyionnet et câriyionnet si fort
Les anciens éthaient dit chest asseais pour rêvillyï les morts.

Yiavet eunne drôle de vieille qui d'meuthait dans la même maison
Ou'l eut si grand peueux asseais pour en perdre la raison
Où dïs jamais d'la vie, t'chesque qui yia yieu la gniet pàseaie?
J'criyiais que t'chet la fein du monde ou bein des r'vénants dans l'aleai.

Ou'l tet si gênaie pour vais t'chesque qui yiavet yieu
Qu'où meins deuex pathes de lunettes et s'transporti vite sus lieu
Ouè-qu'où'l avet entendu l'hoaulouoge câriyionné
Ou dis j'criyiais que t'chet ma fein qui s'nallet arrivé.

Où dis Hélas! hélas!! tchi bonheur que man bouan homme est sourd
S'il entendait chu sabbat là y s'nîthait bein vite dans la tour.
Et bein où s'meins à prié comme où n'avait jamais priyiet d'vant
Où priyiet, bouchet ses yoietheilles et mettait ses lunettes le driyièthe en d'vant.

La bouanne vieille créatuthe n'a pas besoin de s'geinné
Où n'rentendra pas la p'tite haoulouoge câriyionné
Car où n'démeuthe pus à la même maison,
L'hoaulouoge étout a changit d'position.

Georgie

 

Viyiz étout:

 

Les Pages Jèrriaises