Les Pages Jèrriaises

La fanmeuse Rouoyale

Trenton,
Michigan, USA.
Lé 24 dé juilet, 1982.

Moussieu l'Rédacteu,

J'tais întérêssi d'liéthe, souos "Meridian" dans la gâzette du huit dé juilet, qu'eune danme avait pâssé eune tchînzaine dé jours dans eune hôtel ou pension en Jèrri mais, ouaithe qué ch'tait dans l'temps d'la dêfouithie, ou n'eut pon la chance dé vaie eune nouvelle patate sus la tabl'ye. Acouo piéthe, ch'tait des patates frites ou en tinne tch'était l'fricot du jour. Et la danme dit (en Angliais, sans doute): "Tchitch'un peut-i' m'dithe pourtchi?"

Mais oui, nou peut lî dithe pourtchi. J'pouôrrais p't-êt' lî dithe qué ch'est l'avarice des propriêtaithes d'hôtels et pensions viyant tchi peuvent p't-êt' acater des vivres en gros et en tinnes et faithe pus d'profit d'ssus, mais jé n'veurs pon les crititchi mal à propos sans êt' seux d'man coup. Ch'est tout bouan d'critichi, mais faut pouver faithe mus. Eune raîson tch'est p't-êt' pus raîsonnabl'ye et à propos est qué l'couôtement d'la main-d'oeuvre a tellement haûchi qué l'hôtelyi n'peut pon affaûrder a payi assez d'empliyés pour p'ler les patates et prépather les lédgeunmes du gardîn.

La Rouoyale est eune si bouanne et fanmeuse patate qué nou peut comprendre qué les touristes en ont envie quand i' vont en Jèrri. La "nouvelle patate" est un d'lice, et même les Jèrriais s'en liquent les babinnes dans l'temps d'la dêfouithie. Sabre dé bouais et pistolet d'pânnais, j'en mang'geais un fricot à ch't heu si j'pouvais mett' la patte sus eune pann'lée!

Chose bein tchuthieuse ichîn en Améthique est qué nouos soudards prîndrent un tel goût ès patates frites quand il' allîdrent à la deuxième grand' dgèrre en France tch'il' en voulaient quand i' r'vîndrent. Et au jour d'anniet ch'est l'dgiâbl'ye à confêsser d'êprouver à trouver autcheune aut' patate qué des patates frites dans touos les restaurants, et même dans bein d's hôtels à mains qué ché s'sait eune hôtel dé luxe ou d'preunmié clâsse.

Quant à mé, ayant 'té né dans l'pays d'la Rouoyale, pour longtemps jé r'gardais ch'là comme eune însulte dé m'ouffri des patates frites à mangi dans les restaurants quand j'tais en viage ichîn auve man moto. Pour dé mé, ch'est les gâter, les patates, d'en faithe des frites. Dans les restaurants i' continnuent à r'nouveler les p'tites badgettes dé patate dans l'huile ou la graisse dans la peîle ou câsstrole à m'suthe qué les r'pas sont sèrvis, et quand veint l'sé les cheinnes dans l'fond ont envolubinné tant d'huile ou d'graisse qué l'goût d'la patate a dispathu.

Les miyeu patates Améthitchaines veinnent dé l'Êtat dé Idaho, mais j'n'en ai pon 'couo gouôté d'autchun bord tchi valent nouot' fanmeuse Rouoyale dé Jèrri. J'ai 'té êtonné d'vaie tch'i' y'a tchiquefais des membres d's Êtats tchi veulent faithe les fèrmièrs en êprouver d'aut' sortes. Quand j'dis ès fèrmièrs de par ichîn qué la Rouoyale a 'té tchultivé en Jèrri continuellement dépis mil huit chent huiptante sans dêgénéther, il' ont d'la peine à l'craithe.

Quand nou veint à tout considéther, nou créthait qué d'en donner à mangi ès touristes dans l's hôtels et maîsons d'pension, prîncipalement les "nouvelles" en saîson, v'là tchi vaudrait mus pour attriotchi les visiteurs qué l's annonces, tchi couôtent eune forteune, qué l'Conmité du Tourisme met en Angliétèrre et ailleurs touos l's ans. Ch'est vrai, quand nou-s-y pense, qué l's Angliais daivent trouver ch'là drôle tch'il' ont à payi la hauche pour acater les Rouoyales siez ieux en Angliétèrre, et tch'il' ont hâte et espéthance d'en profiter quand i' veindront en Jèrri, où'est tch'i' sont tchultivées, et pis tch'i' n'en trouvent pon sus la tabl'ye dans l'hôtel!

Eune aut' chose bein întérêssante pour mé dans la gâzette du huit dé juilet est l'portrait du Vièr Châté Mont Orgueil quand L's Êtats en prîndrent possession d'la Couronne lé 28 dé juîn, 1907. J'tais pèrsonnellement présent et assis sus l'hèrbe en d'ssus et à côté d'l'entrée du châté où'est qu'les cérémonies eûdrent lieu. J'avais couochi en Ville la seurveil'ye pour prendre lé "train" dé bouan matîn pour Gouôrray et trouver eune bouanne pliaiche à m'assiéthe. La Milice Rouoyale 'tait là en grande ténue, mais ch'tait l'année en r'vénant qué jé d'vîns milicien mé-même. Ch'fut un bieau jour d'êté, et j'mé r'souveins tout-à-fait bein d'touos les dêtails dé la cérémonie tchi s'ensuivit, et nouot' Vièr Châté a bein méthité san nom ordgillieux dé Château Mont Orgueil.

George d'La Forge

 

Viyiz étout:

 

Les Pages Jèrriaises