Le Ménage ès Feuvres.
Lé 22 d'juilet, 1965.
Moussieu l'Rédacteu,
J'sis bein content d'vaie qué L's Êtats ont ieu l'avis dé supporter l'Connêtabl'ye d'St. Hélyi pour empêchi les chars-à-bancs d'aller l'travèrs d'la ville à volonté. Nos rues sont bein trop êtraites - et plieines dé piêtons dans l'êté - pour ches grand' babaines dé vouaituthes-là. Comme l'affaithe en est, atout les pavés plieins d'pèrsonnes à boutitchi ou à r'garder dans les f'nêtres d'boutiques ou tout simpl'yément d'but à bagouler, s'nou-s est prêssis i' faut marchi dans la rue quâsi au péthi d'sa vie, et ch'est à peine si les motos et lorries - tch'ont drouait à la route étout - piêssent sé faufiler parmi les piêtons. Ch'est même ravissant tch'i' n'y a pon pus d'accidents!
V'la tchi né f'tha pon d'ma ès clients des char-à-bancs d'marchi un p'tit but d'vant monter à bord. En pâlant d'marchi un but : I' n'y a rein d'pus pliaîsant qué d'marchi dans les p'tites ruettes dans les pâraisses, les cheinnes tchi n'sont pon trop connues et tchi n'sont pon 'couo envahies par les motos, et d'vaie les vièrs fossés et muthâles tch'ont 'té bâtis pièrre sus pièrre par nouos anchêtres. V'la tchi vouos fait penser à l'îndustrie des vièrs du temps passé. I' n'avaient pon d'peux d'lus peines.
À L'Êta, quand j'vai la p'tite forge à côté d'la carriéthe au pid du Mont Huëlin, où-est qu'man papa soulait forgi et tremper l's ôtis pour les cârrieurs quand l'Sieur Ph'lippe Gallichan (l'prédicateur) la faîthait valer y'a pus d'souoxante ans, j'pense souvent à chu pouorre bouanhomme dé papa, heutheux d'san sort et d'la tache quôtidgienne dè faithe san d'ver dans l'êtat tch'il avait pliu à Dgieu d'l'app'ler, comme nouos l'dit l'Catéchisme d'l'Églyise.
I' fallait bein aimer à marchi dans chu temps-là. Quand il' 'taient à bâti l'Mont d'La Pulente, papa y travaillait dans la carriéthe pour forgi et tremper l's ôtis des cârrieurs et machons. Touos les matîns i' fallait marchi des Landes dé St. Ouën à La Pulente, par L'Êta et La Route des Mielles, et êt' là à sept heuthes. Par lé temps tch'i' tchittait la carriéthe à siex heuthes au sé et r'marchait jusqu'ès Landes il 'tait temps dé s'couochi auprès aver mangi lé r'pas du sé, viyant tch'i' fallait sé r'léver à chîntch' heuthes lé préchain matîn. Il attendait fête au sanm'di viyant tch'i' pouvait tchitter l'travas à chîntch' heuthes lé sé à la pliaiche dé six!
J'm'èrsouveins qué quand j'avais quatre ou chînq ans, j'allais tchiquesfais auve papa et manman des Landes à La Mouaie d'St. Brélade au dînmanche, à pid par La Route des Mielles, pour visiter m'n oncl'ye et ma tante d'Aubert. Quand jé v'nais trop lâssé, papa m'portait sus san dos pour eune volée, et pis jé r'marchais un but. Lé sé, m'n oncl'ye Fraînque d'Aubert mênageait d'habitude à empreunter un quèrre pour nouos r'porter ès Landes. J'avais grande envie d'aver l'pliaîsi d'êt dans l'quèrre, mais j'tais si lâssé qué, malgré mé, j'dormais tout l'long du c'mîn!
Les gens gangnaient lus vie pénibl'yément y'a septante ans. Dans l'Almonnas d' La Nouvelle Chronique de 1912 j'viyais, l'aut' sé, dans l's êvênements d'mil neu' chent onze, lé décès dé Charles Vibert, dé St. Ouën, à l'âge dé 78 ans. Lé r'cit dans l'almonnas nouos dit tch'il avait pèrdu, bein d's années d'vant, les deux bras jusqu'au coute à la siette d'eune explosion dans eune carriéthe. J'm'èrsouveins d'l'aver connu, et, dans san vivant, m'n oncl'ye Ouinn'teur (décédé en Dgèrnésy y'a tchiques années à pus d'huiptante ans) mé dîsait qué ch'tait dans la p'tite carriéthe à côté du Châte d'Gros Nez qué ch'la s'arrivit. Eune minne mantchi à tither, et l'Sieur Vibert êprouvit à la dêchèrgi atout sa barre dé carriéthe (Jumper en Angliais) et l'affaithe sautit et l'explosion lî emportit les mains, et il avait l'but des bras en margalot! I' fallait marchi d'la carriéthe jusqué siez Cap'taine Le Feuvre à la ferme d'Gros Nez. I' n'y avait pon d'téléphone à main ni d'ambulance à v'nîn qu'si les malades comme dé nouos jours. I' pathaît tch'i' juthait comme un pèrdu en marchant, et eune femme lî dit : Oh mais, Mess Vibert : ou' dév'thiez prier l'Bouan Dgieu à la pliaiche dé juther! I' lî rêponnit : Comment dgiabl'ye qué j'peux prier quand j'n'ai pon d'mains? Arrivé siez Cap'taine Le Feuvre, lé j'va fut lié dans l'hèrnais, et i' fut porté à l'hôpita. Ch'est r'mèrquabl'ye qu'un être humain pouvait supporter tant d'pèrte d'sang et un long viage dé même dévant aver les souains d'un docteu sans pèrdre connaîssance et en mouothi.
Il' 'taient dueurs, nouos anciens! Lé Sieur Vibert continnuit à gangni sa vie. J'pense tch'il allait vendre du paîsson par les maîsons, et les gens chouaîsissaient l'paîsson tch'i' voulaient dé d'dans l'pangni pendu l'tou d'san co, êt m'ttaient les sou dans sa pouchette dé câsaque. Dans chu temps-là, eune pèrsonne tch'allait sus la pâraisse, comme nou disait des cheins tchi r'chévaient d'l'assistance parouaîssiale, n'était pon bein veue, et ch'tait considéthé honteux d'en d'mander. Hélas! Tchi changements d'nouos jours!
George d'La Forge
Viyiz étout: