Ottawa, Ontario,
Canada.
Lé 19 dé mai, 1973.
Moussieu l'Rédacteu,
M'èrvéla au Cannada à visiter ma soeur Emily et man fréthe Sydney et sa femme et lus êfants et p tits-êfants. Ch'est tréjous un pliaisi pour mé d'èrvaie les vièrs anmîns, étout, tchi travaillaient à côté d'mé dans l's offices du gouvèrnément d'la Dominnion en 1919-1921 dévant m'n aller travailli et d'meuther dans l's Êtats-Unis. Malheutheusement, i' n'y en a pon un tas d'ches-là tchi sont du rang des vivants à ch't heu. Lus nombre rap'tiche touos l's ans. J'ai d'la peine à réaliser qu' y'avait chînquante-trais ans l'mais d'novembre pâssé d'pis m'n arrivée à Ottawa en 1919. Comme lé temps s'pâsse! Et acouo, quand nou-s-y pense, chînquante ans n'est rein dans la veue d'L'Êtèrnel - comme lé Psalmiste David Lî dit dans l'quatrième vèrset du nénantchième Psaume : “Mille ans sont devant Tes yeux comme le jour d'hier qui est passé, et comme une veille en la nuit!”
Jé v'nais d'èrchéver la gâzette du chînq d'avri quand j'm'en vîns à Ottawa y'a deux-s'trais jours. Ou n'pouvez pon vouos înmaginner l'pliaisi d'la r'vaie arriver auprès aver 'té sans pour un mais et sans saver tch'est tch'i' s'pâssait en Jèrri. La dreine èrchue d'vant chette-là 'tait du preunmyi d'mar, ch'est en tchi i' dait y'en aver acouo ieune à v'nîn dépis qu' la grève né duthit qu' trais s'maines. Quantchi tch'i' s'en vont êt' abolies, les grèves, en faveur dé l'arbitrâtion? L'publyi est tréjous l'pèrdant car ch'est li tch'en est tréjous à la dupe.
En liêsant la gâzette j'ai 'té frappé par lé nombre d'pèrsonnes décédés dans l'mais d'mar. Parmi l'nombre j'ai r'gret d'vaie l'nom d'ma couôsinne Elizabeth, femme du couôsîn Adolphus George, eune charmante pétite danme tchi v'nait souvent à la rencontre, à l'aérodrome à St. Pièrre, des membres d'nouot' fanmile arrivant en Jèrri, pour lus souhaiter la beinv'nue. Et pis j'vai l'décès d'plusieurs anmîns qu' j'ai connu toute ma vie, entr'autres les Sieurs John A'Court et John Philip Le Maistre (d'la Porte) d'St. Ouën, Mdlle. Eva Bisson, d'la Mouaie à St. Brélade; Mdme. Carter, née “Gwen” Cory, organiste à St. Simon et pus tard à St. Brélade. Ou t'nait d'san p'pèe pour la mûsique. Oulle 'tait eune mangnifique pianiste et avait eune belle vouaie. Ou chantait souvent toute seule ès sèrvices dé l'églyise à St. Brélade. Et pis Mdme. Veuve Charles Bisson, aut'fais d' “Woodlands” à Ste. Mathie, dans sa huîptante-neuvième, année. J'eus eune longue convèrsâtion auve lyi en Jèrriais l'année pâssée. Et j'm'en vais mantchi man vièr anmîn “Bill” Carré dans man vaîsinné à St. Ouën où'est qu' j'espéthe d'être d'ichîn deux ou trais s'maines. Dans l'entrétemps, mes condoléances ès fanmiles affiyigies. J'sai bein qué j'sis en r'tard à l's exprînmer, mais les gâzettes prannent si longtemps à v'nIn ichîn, et i' sont la souche de mes nouvelles dé l'Île.
Hélas! Comme i' s'en vont, les vièrs anmîns. Un vièr diton nouos dit qu' ch'est les bouans, tchi s'en vont, et qu' les mauvais restent. V'la tchi n'm'encouothage pon d'êt' iun des bouans, car ouaithe qué jé c'menche à châtchi j'mé pliais bein ichîn bas! Enfin, ch'est la vie. L's uns lus en vont, mais il en r'veint d'autres pour les rempliaichi. I' n'manque pon d'mathiages et d'naîssances dans la gâzette. Eune aut' chose tchi m'frappe est qu' les copeux dé g'veux n'daivent pon vivre gras en Jèrri. Quand nou r'garde les portraits des nouvieaux mathiés dans la gâzette nou vait tch'i' sont quâsi touos barbus ou tch'il ont les g'veux longs. Et i' trouvent quand même eune femme! Si j'tais janne j'laîss'sais ma barbe craître pour êprouver à en trouver ieune étout, dépis qu' ch'est les barbes tchi pathaîssent l's attither. Charles Darwin n'tait p't êt' pon bein liain d'la probabilité quand il êcrivit s'n originne des espêces!
Eune chose èrmêquabl'ye, ouaithe qué ch'est pûtôt un êvénement fanmilyi à ch't heu, est qué sus souaixante-tch'ieune naissances i' n'y a qu' onze ou douze vrais noms Jèrriais. Nouot' race dispathaît à grands pas.
Ch'est tréjous amûsant d'liéthe les débats dans L's Êtats. J'vai qu' les membres ont ménagi à légalîser l'stationnement d'lus motos sus l'pavé dans L'Vièr Marchi. J'pense bein qué par “pavement” ch'est l'trottouaithe tch'est entendu, car tout L'Vièr Marchi entre ses deux rues est pavé. Nou n'peut pon s'y tromper en Améthique car lé trottouaithe est appelé “side walk” là, et les routes sont appelées “pavées” quand i' sont couvèrtes d'chînment ou féthées (“macadamized” en Angliais).
J'aime hardi l'idée du Sénateu John Le Merquand d'aboli la route dé La Cour Rouoyale et d'paver L'Vièr Marchi jusqu'au d'vant du bâtisse dé La Cour et d's Êtats, mais j'crains qu' chu propos-là n'éthait pon grand support dé la part des membres car il' éthaient à stationner lus motos aut' bord et marchi deux pas. Il est bein évident tch'i' sont pus au-faits à parlochi qu' à marchi!
George d'La Forge
Viyiz étout: