Fort Lauderdale, Florida,
U.S.A.
Lé 20 d'avri, 1974.
Moussieu l'Rédacteu,
La gâzette dé Jèrri du 28 févri m'a donné tout pliein d'tchi liéthe - les débats dans L's Êtats au sujet du rapport du Commité Policy Advisory. Dans ma lettre du 23 d'mar, j'vouos dîsais qu'après en aver liu un alibêle dans la gâzette du 24 janvyi j'n'en tais pon fort pus d'l'avant. Eh bein, auprès lectuthe des délibéthâtions dé chutte dreine séance j'n'y vai pon pus cliai. J'avais espéthé d'vaie les Connétabl'yes des onze pâraisses dé la campagne lus buter sus lus pids d'drièthe pour entanmer eune distchussion au sujet d'l'agritchultuthe, un sujet tchi m'pathaît aver r'chu p'tit d'mention dans l'rapport, mais à ma grand' suprînse rein n'en fut dit sénon par lé Député L'Bro d'St. Jean tch'en pâlit dans sans discours. Ch'est seux tch'i' s'en va faithe un bouan Député, ch'tî-là.
Par tchuthiosité, j'contis l'nombre d'membres tchi prîndrent part dans les débats, et ma fîngre, y'en avait eune trentaine, pus ou mains. Un mio pus à prendre la pathole qué d'habitude, i' m'sembl'ye. Mais comme lé dit vouot' supèrbe articl'ye d'fond, tch'est tch'i' s'arrive à ch't heu? Quant à mé, comme j'l'ai mentionné d'avant, la qualité d'la vie est eune affaithe dé goût et d'opinnion, et, à m'n idée, l'augmentation d'la population d'Jèrri à huiptante mille dans tchiques années n's'en va pon aîdgi à la hauchi, et quand nou vait qué l's autorités parouaîssiales ont payi quat' chent trente mille louis l'année pâssée ès cheins tchi sont sus la pâraisse, v'la tchi n'mé fait pon penser tch'i' y'a raîson dé s'vanter d'la qualité d'la vie actuelle. Dans la vie d'aut'fais qu' j'ai connue, ch'tait considéthé honteux d'êt' sus la pâraisse, et ouaithe qué la vie 'tait pus duthe pour un tas, la qualité - point d'veue d'contentement - 'tait bein miyeuthe.
Eune chose est frappante: si toute l'expèrtise engagie par L's Êtats mènage à bâti assez d'maîsons pour touos les chein tchi sont actuellement à attendre pour, et pour louogi les cheins à v'nîn jusqu'à qu' la population augmente à huiptante mille, y'étha acouo mains d'run pour l'agritchultuthe. Mais si les fèrmièrs veulent combattre lus pèrte d'vrégies, y'étha tout pliein d'Avocats à pliaidgi lus causes dévant justice. Acouo trais nouvieaux assèrmentés à ches drein! Faut-i' tch'i' y'aie des sou à faithe dans chutte profêssion-là pour en attither tant! Et deux femmes, à ch't heu! La Cour s'en va-t-alle féminîser l'titre d'Avocat à Avocatte? Y'en a-t-i' parmi touos ieux, à l'exception d'l'Avocat J. J. L'Mèrquand, tchi pouorraient pliaidgi eune cause en langue Jèrriaise?
Ch'est tchuthieux étout, d'vaie l'nombre d'compangnies enregistrées châque sémaine. Ieune des gâzettes nouos disait tch'i' y'en eut mille sept chent souoxante-chînq l'année pâssée. J'en ai conté deux chent quarante-deux ch't' année jusqu'au 7 dé mar, date dé la dreine gâzette èrchue. Tch'est tch'i' font toutes ches compangnies-là? Fonctionnent-i' en Jèrri? I' m'sembl'ye qu'ieune des choses împortantes à lus êgard est qu'un tas donnent l'honneu ès clèrcots et clèrcotes dans l's offices d'Avocats et Êcrivains d'êt' membres fondateurs et fondatrices. Ch'n'est pon d'la p'tite biéthe, valet! Si l'affaithe continnue, nou pouorra donner un nouvieau nom à l'île. Nou pouorra l'appeler Jèrri et Compangnies, mais non-lînmitées!
Dans la gâzette du 7 dé mar arrivée ichîn à la minnute, j'vai l'histouaithe fascinnante d'eune cause célèbre, la cause des Pigeons contre l'Assembliée des Êtats en Séance. Les Pigeons sont atchûsés d'faithe sèrvi l'lief dé La Chambre des Êtats et d'La Cour Rouoyale sans pèrmission comme colombyi. Item: Dé faithe sèrvi L'Vièr Marchi comme tchuîsinne et dêpense et d'y mangi lus r'pas. Item: Dé laîssi tchaie en ruinne les ouaiselées et généralement touos les d'lices dé la tchuîsinne n'împorte où - au préjudice des bouais, du pavé, d'l'estatue du Rouai, des bancs, et mème des têtes des gens!
Îndîngnis dé tel comport et affront ouaîselîn, cèrtains r'présentants du peupl'ye voulaient condamner eune proportion d's atchûsés à êt' - par les mouoyens les pus mîséricordieux, i' faut dithe à lus crédit - mîns à mort.
Lé bouan Député Stanley Le Ruez, tch'a l'filet bein copé et tch'est, comme mé, un grand anmîn des pigeons, pliaidgit lus cause supèrbément, et en liêsant san discours jé m'faisais seux qu' les pouorres ouaîsieaux allaient en gangni. Hélas! Ché n'tait pon pour être, et i' faut s'attendre qué dans tchique temps pon 'couo dêtèrminné, y'étha un tas d'pigeons en deu dans L'Vièr Marchi!
Si j'avais 'té en Jèrri dans l'temps, j'éthais peu suggéther un r'miède tch'a 'té trouvé efficace ichîn en Améthique où'est qu'les pigeons ont peux des tchillieuvres. I' n'y a qu' mettre eune demié-douzaine dé tchillieuvres en caoutchou sus l'haut des bâtisses tout l'tou du Vièr Marchi et les pigeons - mettons tch'il' aient les mèmes partitchularités comme lus couôsîns d'Améthique - n'y mettront ni aile ni pid!
George d'La Forge
Viyiz étout: